uMthunywa
Nobuhle Mgwaqo
UKWANDA kwamadoda ayasebenzela kweleSouth Africa kunye leBotswana esigabeni seTsholotsho sekuvezwe njengesizatho esibangela ukumemetheka kwegcikwane leHIV esigabeni lesi.
Ekhuluma lentathelizindaba ngesikhathi zikuMedia Tour ngoMvulo, uProvincial Manager weNational Aids Council esabelweni seMatabeleland North, uMnumzana Dingani Ncube uthe isigaba seTsholotsho silabantu abanengi abatheleleka ngegcikwane leHIV ngomnyaka ngenxa yokwanda kwenjiva.
Uthe imuli ezinengi eTsholotsho kazihlali ndawonye okwenza ukumemetheka kwegcikwane kubephezulu.
“Isigaba seTsholotsho ngesinye sezigaba ezilabantu abanengi abaphila legcikwane le-HIV elizweni.
“Isabelo seMatabeleland North sonke jikelele silesilinganiso sabantu abatholakala belegcikwane leHIV se-15,5 phesenti.
“ITsholotsho ilabantu abayisilinganiso se-22,9 phesenti sabantu abaphila legcikwane leHIV,” kuveza uMnu Ncube.
Uqhubekele phambili esithi ukwehlukana kwezimuli ngenxa yokuyadinga imisebenzi yikho okwenza igcikwane leHIV limemetheke ngamandla.
“Isigaba seTsholotsho yiso esilabantu abanengi abatholakala belegcikwane leHIV elitsha ngomnyaka ngesizatho sokuthi abathetheneyo kabahlali ndawonye.
“Amadoda amanengi eTsholotsho asebenza eSouth Africa leBotswana kukanti omkabo bahlala ngapha ekhaya.
Lokhu yikho okubangela ukukhuphuka kwenani labantu abaphila legcikwane leHIV.
“Phezu kwalokho amadoda la achapha umngcele esiya eSouth Africa engelamaphepha eneleyo ngesizatho lesi kubanzima ukuthi bafinyelele ezempilakahle ngoba bengabahlali abangekho emthethweni. Kungakho nxa bephenduka ekhaya sinanzelela ukuthi bayabe belolwazi olulutshwana ngeHIV kunye leminye imikhuhlane ethelelwana emacansini babuye bangene emacansini bengazivikelanga labomkabo,” kuchasisa uMnu Ncube.
Uthe balutshwana abasebenzisa amajazi abakhwenyana.
“Omalayitsha labo nxa beqhuba umsebenzi wabo bechapha umngcele baziphatha ngendlela ezikhuphula izinga leHIV esigabeni.
Uthe loba kunjalo sebeluke inhlelo ezifanele lesisigaba ukuze babele uzulu ngemikhuhlane ethelelwana emacansini lendlela zokuziphatha eziyingozi.
“Silenhlelo ezehlukeneyo eziqhutshwa esigabeni ukwehlisa ukumemetheka kwegcikwane leHIV leAids ezigoqela iBrother2Brother ehlose ukuhlomisa abesilisa ngolwazi ngendlela zokuziphatha ezingafanelanga.
“Silolunye futhi uhlelo lwamantombazana asakhulayo labomama abasakhula.
“Inhlelo lezi zifundisa ngendlela zokuzivikela emacansini ngokusebenzisa amajazi abakhwenyana, ukuyahlola isimo sakho, kunye lendlela zakulezinsuku zokuzivikela ngokusebenzisa iPrEP,” kuphetha uMnu Ncube.
