uMthunywa
Langelihle Moyo
INHLANGANISO yeAgritex esabelweni seMatabeleland North isixwayise abalimi ikakhulu labo abafuyileyo ngokuqakatheka kwamahlanga ezilimo ezigoqela umumbu lamabele, ekulungiseni ukudla kwezifuyo.
Oyingcitshi kwezokulima lezokufuya, uMqondisi kunhlanganiso le, uMnumzana Dumisani Mbikwa Nyoni uxwayise abalimi ngokuqakatheka kokugcina kuhle amahlanga.
“Nginanzelela ukuthi emapulazini lasemasimini abalimi abanengi, ngemva kokuvuna amahlanga ayasala enjalo besokusithi ngemva kwesikhathi besokungeniswa imihlambi emahlangeni.
“Zikhona indlela elingazilandela ukuthi libuthelele amahlanga lawa liwalungise abeyikudla kwenkomo okulohlonzi.
“Lokhu kwenza ukuthi lingabe lisazihlupha ngokuthenga ukudla kwezifuyo okudulayo,” kuchasisa uMnu Mbikwa Nyoni.
“Nxa uqalisa kulomsebenzi omkhulu sibili, ngoba amahlanga lawa kumele agecwe afakwe phakathi kwamasaka kumbe phakathi kwamabhokisi abesefakwa emthunzini ngaphansi kwesihlahla okuthiwa ngesiLungu yi-baling.
“Ukwenza lokhu kuyanceda ngoba umlimi kakhiphi imali yokuthwala kumbe ukudinga imota yokumthwalela ezamenza abhadale.
“Okwesibili kuqakathekile ukuthi linanzelele ukuthi lapho eligcina khona amahlanga lawa kusemthunzini njalo kuyangena umoya lokuthi yindawo lapho okungafinyeleli khona umuhlwa lamanzi.
“Ngoba nxa kungangena amanzi amahlanga lawa ayenelisa ukukhunta,” kutsho uMnu Mbikwa Nyoni.
“Nxa selenze njalo amahlanga lawa kumele liwaqume abemafitshane anele kuhle emasakeni, lokhu kuyancedisa ekuthini izifuyo zithakazelele ukudla lokhu njalo okunye kuyancedisa ukuthi umlimi abekwazi ukuthi izifuyo zakhe zidla amasaka amangaki ngeviki lokuthi zidla ukudla okunganani ngosuku.”
Uphethe ngokuthi abalimi bangadlalisi imali bethenga ukudla kwezifuyo bona belamahlanga ezilimo emasimini abo.
“Asingasebenzisi imali enengi sithenga ukudla kwenkomo okubizayo, thina silawo amahlanga emasimini ethu. Ukugeca amahlanga kuyasincedisa ekuphunguleni indleko zemali sithenga.
“Okunye njalo amahlanga lawa kuqakathekile ukuthi siwafafaze ngamanzi alesawudo, lokhu kwenzelwa ukuthi amadolo ezifuyo aqine,” kuphetha uMnu Mbikwa Nyoni.
