uMthunywa
Gerald Sibanda
IQEMBU elidlala kuligi yeZifa kumhlubulo ongezansi yelizwe, i-Arenel Movers liqhubekele phambili ngegiya lalo lokwenza kuhle ngemva kokuba linqobe iMosi Rovers 6-1 eWhite City.
Umdlalo lo oqhutshwe ngoMgqibelo odluleyo, uqinise indawo yaleli iqembu esiqongweni selogu.
Ihlohle sengathi ithelwe ngamanzi i-Arenel kumabhola amabili avele kukaputeni uZibusiso Dambo, elilodwa elikhatshwe nguFrank Mthethwa, Leroy Ndlovu, Kudzai Dzingwe kunye lelinye elihlohlwe ngoweMosi Rovers aqinisekise ukuthi abafana bakamqeqetshi uKudzai Mhandire baqhubeke ngendlela efaneleyo, bedinga ukuthi bangene kuligi ephakemeyo eyePremier Soccer League.
Umdlali we-Arenel uLeeroy Ndlovu uthabe umanzi te ngokunqoba kweqembu, nanko usebona ukuthi ikusasa labo livulekile.
Uthe ubengakholwa ukuba bengahlohla amabhola wonke la bedlala leqembu leMosi Rovers.
“Ngijabule ngokuthi sinqobile, kodwa sikhuthe inqwaba yamathuba amahle. Insuku kazifani. Ngelinye ilanga uyakhutha, ngelinye uhlohle. Kuyangijabulisa ukuthi ngenelisa ukuhlohlela iqembu lami. Iqembu lihamba ngendlela kodwa kuzamele siqaphele ukuthi umkhankaso wenkezo yeligi kawukapheli,” kutsho uNdlovu.
Ukunqoba kwe-Arenel kutsho ukuba leliqembu selivule inkalakatha yesikhala semiklomelo engu-12, phezulu kwengalane yelogu. Lilandelwa ngabafana bamagetsi abe-ZPC Hwange.
I-ZPC Hwange ibanjwe nge 0-0 le-Adachi FC, iqembu eliqeqetshwa nguPhilani “Beefy” Ncube.
Kulandela ukukhonona okwabakhona enkambeni ye-Arenel ngenxa yokungatholi iholo, kuyancomeka ukunqoba abakwenzileyo. Okwamanje yilo lodwa iqembu elingakatholi ukunqotshwa.
Kusenjalo, i-Arenel Movers kubikwa kayisoke idlale phakathi kwaliviki. Amanye amaqembu azathi ukuphindela enkundleni impelaviki ingakafiki.
Iqembu le-Arenel, elidume ngokuthi “Abafana Beziwiji” bekumele lidlale leZimbabwe Saints eyaxotshwa kuligi ngenxa yokuswela imali.
Lokhu kutsho ukuba Abafana Beziwiji bazaphiwa imiklomelo emithathu mahala.
Kusenjalo, amaqembu abalisela Indlovu Iyanyathela, iJordan Sinnot leBinga Pirates, zizaqhubeka zizama inhlanhla kumkhankaso weligi.
Impumela yemidlalo:
Arenel Movers 6-1 Mosi Rovers, DRC United 0-1 Jordan, Binga Pirates 0-1 Indlovu Iyanyathela, Casmyn vs Mainline (pp), ZPC Hwange 0-0 Adachi
