uMthunywa
Silo OPhezulu Stinta
Ngeviki edlulileyo besixoxisana ngesisindo solimi esenza umuntu ananzelele umumo wezinto lapho kukhulunywa ngolimi oluthile.
Nanzi ingcazelo zenkulumo yeviki edlulileyo.
a. Thambo lenyoka hlaba omzondayo
Kutsho lapho ufisela umuntu omzondayo ukufa.
b. Umntwana wesilwane yisilwane
Kutsho ukuthi akukhathalekile ukuthi ngumntwana onganani nxa evele ezalwa yindoda uhle acace ukuthi uzalwa yindoda yamadoda.
c. Loba kungela qhude kuyasa
Kutsho ukuthi umuntu ozitshela ukuthi nguye nguye angaze acabange ukuthi nxa engekho izinto ziyema kakunjalo abantu bayaqhubeka nje.
d. Ubotshwe ngawakhe amaketane
Imisebenzi yakhe yiyo esimfake phakathi kohlupho
e. Utshaye ekhaleni
Uphe impendulo eqonde nta
f. Idlozi liyaphakelwa
Lapho ukudla kuchitheka ungabokhala yiyo indlela yokuthi abaphansi labo badle
g. Ngikubeka isikhupha
Loba ungonile angizukulwa lawe lamuhla kodwa sizahlangana phambili.
h. Ubambe owangaphansi
Lapho umuntu uyabe emangele ebambe owangaphansi
i. UTshaka usekhaya
Kutshiwo ngomuntu oqeda abantu ukuthi ukhona lapha ekhaya
j. Elenxeba ilenxeba
Loba bonke befihla kodwa olecala uzabonakala kuphela
