uMthunywa
Nkosilathi Sibanda
KWEDLULE imidlalo eyisikhombisa abasekeli beHwange bengakaze babukele iqembu labo ekhaya, kodwa kuzakuba yinjabulo kulimpelaviki kuvulwa amasango enkundleni yeColliery.
Ingungu zizadumela phezulu, sekuhlatshelwa ingoma zokukhuthaza iqembu kumdlalo weligi yeCastle Lager ozadibanisa abafana beChipangano lezethekeli zeBulawayo Chiefs ngoMgqibelo emini.
Ukuvulwa kwenkundla yeColliery kuzaletha uvalo kumaqembu kuligi ephakemeyo nanko phela kuyaziwa ukuthi ilanga litshisa kakhulu kulindawo, ikakhulu ngehola lapho okuqalisa khona imidlalo yenguqu. Imbali iyakuveza ukuthi akulula kwamanye amaqembu ukuphuma eHwange ephethe imiklomelo yonke.
Abaqeqetshi labadlali bathi iHwange incedwa yikutshisa kwelanga ekhaya layo.
Isikhulumi senhlanganiso yeZimbabwe Football Association, uXolisani Gwesela wethule indaba ezimnandi lezi kuliviki ngesikhathi iqembu leHwange lisaphumula koBulawayo ngemva kokunqotshwa yiHighlanders 1-0 ngeSonto edluleyo.
IHwange ibisebenzisa inkundla yeLuveve njengekhaya layo, isalinde ukulungisiswa kweColliery.
UGwesela uthe ngemva kokuhlolisiswa kwenkundla yeColliery yikhomithi yabo, kubekwe umbono wokuthi kayisetshenziswe.
Isikhulumi seZifa lesi siphinde sabika ukuba inkundla yeBata Stadium eGweru isilungele ukusetshenziswa liqembu leSheasham.
Iqembu elidabuka eNkabazwe leli beliboleka inkundla yeMandava, edolobheni leZvishavane.
“Inkundla ye-Colliery Stadium kunye leBata Stadium sezilungisiwe njalo sezivunyelwe ukuthi ziphathe imidlalo yePremier Soccer League,” kutsho uGwesela.
Ukuvulwa kwenkundla lezi kukhangelelwe ukuthi kwehlise indleko zamaqembu womabili. Ngenxa yokuthi asephenduka kubo, kutsho ukuba azathola imali engcono emagedini.
Amanye amaqembu asalinde ukuhlolisiswa kwenkundla abalisa iZPC Kariba, Black Rhinos, Cranborne Bullets, Manica Diamonds, Manica Diamonds, Simba Bhora kunye leGreenfuel.
