uMthunywa
Ricky Zililo
OWAYENGUMDLALI weqembu leChicken Inn Football Club uBrian Juru useqale umkhankaso wokuqoqa ama- sanitary pads angaba ngu-1 000 azawanikeza amantombazana kibo esiqintini seShagare, eLower Gweru, eNkabazwe yelizwe.
Umdlali lo, oleminyaka yokuzalwa engu-33 odlalela iqembu leZPC Kariba uthe ama-pads azatholakala azahanjiswa kunhlanganiso yeBrian Juru Foundation.
“Njengoba sisondela kancane kancane kunyanga yeWomen’s Month, sizabe silomkhankaso wokudinga ama-pads,” kutsho uJuru.
“Inhloso yethu ngeyokuqoqa ama-pads angu-1000 amantombazana eLower Gweru. Sigxile ekuthini sincedise abantwana abasesikolo ngoba siyazi ukuthi inengi labo liyehluleka ukuthenga impahla le.”
Uqhubeke wathi: “Esikhathini esizayo sizafuna ukusungula i-pad bank lapho la amantombazana angathola khona ama-pads la mahala.
“Sidinga uncedo ekuthini senze ama-sanitary pads afinyeleleke kwabasakhulayo. Kulabo abafuna ukuphathisa, sicela baxhumane lathi kunombolo zeWhatsApp ezithi: 0773117061 kumbe 0778128352,” kutsho umdlalo lo.
