uMthunywa
Nkosilathi Sibanda
AKULA ngeyinye indlela ngaphandle kokuthi bayihlabele lingoma abasekeli beHighlanders mhla eyabo inxuse iDynamos kumdlalo weligi yeCastle Lager.
Kuzahlatshelwa kuze kutshe amazwi kudingwa ukuthi abagadli beBosso balibhoboze igedi ukuze iDeMbare ingaphenduli.
Konke lokho kuzabonakala ngeSonto emini enkundleni yeBarbourfields.
Zombili ziyaziwa njengenkunzi zomdlalo wenguqu kuleli.
Akuthandabuzwa lokhu. Zihlangana okwesibili lonyaka.
Kumdlalo wakuqala, kunkezo kazibuse, iHighlanders yanqoba nge 1-0, okuyikhona okubeka eyakoBulawayo phezulu ngedlabuzane.
Impumela le yaba buhlungu emulini yeDynamos okokuthi lomqeqetshi wayo, uTonderai Ndiraya, ngoMabasa wabika ukuba uzaqinela ukukhulela iHighlanders kumdlalo weligi.
Ekhuluma lentatheli yephephandaba likazulu ngoLwesibili, uNdiraya uyiphindile eyokuthi angeke aphume edliwe eMagumeni.
“Ngumdlalo omkhulu lo.
Isiqokoqela yikuthi siphume eBarbourfields silemiklomelo yonke.
Okwenzakala ngenkezo kaZibuse ngokunye ngoba sesivule ikhasi elitsha.
Le yiligi ngakho sikhangelane lempi etshiyene leyakuqala,” kutsho umqeqetshi lo.
Uthe akulasizatho sokuthi atshele abafana bakhe ngobukhulu bomdlalo lo.
Tonderai Ndiraya
“Eqinisweni, bayakwazi ukuthi umdlalo lo uqakatheke kanganani.
Wonke umdlali kumaqembu womabili uyazi ukuthi kuzafiwa ngeSonto.
Abami abadlali bahlezi besazi lokhu.”
Izethekeli lezi ezivela esigodlweni selizwe zingena umango zilande iqembu eliqhulayo.
IHighlanders isebunzimeni nanko yacina ukunqoba mhlaka 27 Mbimbitho mhla isidla iYadah nge 3-0 eBarbourfields.
Umdlalo wangeSonto uveza sobala ukuthi iHighlanders loba ingaze inqobe, ayisoke yafinyelela ibanga leDynamos kulogu. Amathimu la atshiyene ngemiklomelo engu 14.
IDynamos ikhokhela zonke iphethe engu-30, kuthi iHighlanders iyaqhula kunombolo yetshumi lanye ithwele imiklomelo engu-16 kuphela.
Zibuhlungu inhliziyo zabalandeli beHighlanders ngokukhangela isimo seqembu.
Loba besizwa ubuhlungu, abalandeli abakhulume loMthunywa kuliviki babike ukuba ithimu yabo angeke kwenze ukuthi iqede isizini isadalala ngendlela eyangisayo.
Bathe nxa iHighlanders ingekho, kuyabe kungelamncintiswano ozwayo kunguqu yakuleli.
Labanye abalandeli bamanye amaqembu bavumelana lokuthi nxa iHighlanders ingaqhubeka idlala njengabafana besikolo, akusoke kube lenguqu ehlabusayo.
UBusani Ncube osekela iHighlanders uthe akujabulisi ukuthi iqembu lakhe lihlezi kunombolo yetshumi lanye kungalane yamaqembu.
“Asazi ukuthi sizacatsha ngaphi nxa iDynamos inganqoba ngeSonto,” kutsho uNcube.
“Kunzima ukukukholwa ukuba singayekethisa singazibona sesikuligi ka-Division One.
Ngitsho, khona sizake sibone.
Kodwa abadlali labaqeqetshi sikhulekela ukuthi benze kuhle ukuze lathi siphume sijabulile,” kutsho lumdlali.
UTimothy Dhliwayo ohlala eMaphisa uthumele intatheli yephephandaba likazulu ukuba kungabe kubuhlungu ukwehlika kweqembu kodwa ilanga langeSonto ngelabo.
“Ngibingelela bonke abathandi benguqu izwe lonke, ngithi asambeni ngobunengi siyebukela iHighlanders leDynamos,” nguDhliwayo lo.
“Kwezethu kuHighlanders ngithi ayibophe iqine.
Sizayihlabela ingoma, siyikhuze ithimu yethu.
Ukuwa kwayo akumelanga kube yikuwa kwethu.
“Mina ngiyala ukuthi ingadliwa yiDynamos.
Ayisimi ngedwa engikholwa lokhu.
Sizaphela sibone kodwa eyinye ayiphumi.
Iqiniso yikuthi akujabulisi ukubona iqembu elilabalandeli abanengi linqotshwa.
Yithimu yezwe lonke le esikhuluma ngayo.
Imidlalo yethu leDynamos iligugu kunguqu yeZimbabwe.
Sikhuthaza ukuthi abadlali bethu bephakamise umdlalo wabo banqobe.”
Umlandeli weBosso lo uthe usola abadlali abakhona ngoba abaselayo intshukuntshu yokudlalela ukunqoba.
Imidlalo yeCastle Lager kuviki lesi-14
NgeSonto: Yadah v FC Platinum (National Sports Stadium)
NgoMgqibelo: Ngezi Platinum Stars v Tenax CS (Baobab), Herentals v Bulawayo Chiefs (National Sports Stadium), Bulawayo City v ZPC Kariba (Barbourfields), WhaWha v Harare City (Ascot)
NgeSonto: Highlanders v Dynamos (Barbourfields), CAPS United v Chicken Inn (National Sports Stadium), Manica Diamonds v Black Rhinos (Sakubva), Triangle United v Cranborne Bullets (Gibbo).
