uMthunywa
NGEMUVA kokuthi uPitso Mosimane, enze imbali ngokuba ngumqeqetshi wokuqala wase-Africa, ukudla isicoco seCaf Champions League amahlandla amathathu, usole amaqembu akuleli zwekazi ngokwekela ukuqhatsha abaqeqetshi base-Africa.
UMosimane uthole isicoco sesithathu njengomqeqetshi seChampions League ngemuva kokuthi iqembu lakhe lase-Egypt, i-Al Ahly, ibhudluze iKaizer Chiefs nge 3-0 ngoMgqibelo ebusuku, enkundleni yeMohammed V Stadium, eMorocco.
Ngo-2016 umqeqetshi wathatha isicoco sakuqala salumqhudelwano eqeqetsha iMamelodi Sundowns.
Ngaphezulu kwakho konke lokhu, uMosimane ube ngumqeqeshi wesine eminyakeni engu-57 yeChampions League, ukudla lesi sicoco amasizini elandelana.
Ukuvikela iChampions League kwacina ukwenzeka ngo-2005 lango-2006 kwenziwa nguJose Manuel wasePortugal, owayeqeqetsha yona i-Al Ahly.
“Ngizizwa ngihloniphekile ngokuthi abaphathi be-Al Ahly batshengise ukungethemba ngeqembu labo.
“Akukho obekubavimba ukuthi bayekhangela e-Europe. Kuyangijabulisa lokhu ngoba kuyakucacisa ukuthi lathi singabase-Africa, silakho ukunqoba izicoco ezimqoka.
“Kungani amaqembu athathwa njengamakhulu e-Africa engakholelwa kubantu babo? Kungani besaqhubeka lokukhangela e-Europe balande loba ngubani?” – @NkosieSibanda
