uMthunywa
YiNtatheli kaMthunywa
INHLANGANISO yeZIMBABWE Cricket (ZC) ibike ukuba iqembu lesizwe lizabuye njalo lidlalele enkundleni yeQueens Sports Club koBulawayo, ngemva kwesikhathi imidlalo iqhutshwa eHarare kuphela.
Iqembu lekhilikithi yabomama elama-Lady Chevrons lizadlala leSouth Africa kumidlalo emihlanu kuhlandla lama-50 Overs kusukela mhlaka 18 kusiyafika umhlaka 28 kuNkwenkwezi.
Kulumdlalo iZimbabwe izabe ilungiselela imidlalo ye- International Cricket Council Women’s Cricket World Cup Qualifier ekhangelelwe ukuba selizweni le-Sri Lanka ngoMpalakazi.
Inkezo yomhlaba kumdlalo wabomama kubikwa uzakuba khona ngoMbimbitho ngo2022.
Kumbiko othunyelwe iphephandaba likazulu kuyonale iviki, inhlanganiso ye-ZC ithe iqembu seliphakathi kokulolongela imidlalo le.
“Iqembu lama-Lady Chevrons lizaphindela emdlalweni ngeviki ezayo lapho elizadlala khona le-South Africa Emerging Side. Imidlalo izaqhutshwa mhlaka 18, 20, 22, 24 lo 26 kuNkwenkwezi enkundleni ye-Queens Sports Club koBulawayo,” kutsho iZC.
“Abadlali abalitshumi lanhlanu sebevalelwe enkambeni yokulolonga kusukela ngoLwesithathu lweviki edluleyo eHarare Sports Club. Bazabe bekoBulawayo ngoMgqibelo.”