uMthunywa
Izingoma
Ophezulu Stinta
Sisaqhubeka ngemibhalo yethu engalotshwanga, lapho esizathi ukukhangela khona izingoma zomdabuko. Ekadeni bezikhona ingoma njengoba nje lalamuhla zikhona. Esikunanzelelayo yikuthi ingoma lezi zilakho ukutshiyana okwamagama. Ngokunanazelela imihlobo yezingoma kakhulu ngelihlo layizolo, sithola imihlobo le elandelayo,
Imilolozelo
Izingoma zezimpi
Ezokuthethela
Ezesitshingo
Ezengungu
Ezehosana
Ezomtshitshimbo
Ezembube
Ezengquzu.
Kesikhangele imihlobo le yezingoma.
Imilolozelo: ingoma lezi zisetshenziswa ngabalizane, kanye labadlezane nxa bethulisa abantwana, babezihlabela kakhulu ngesikhathi bebelethe abantwana laba emhlane. Sikhumbuzane nje ngamafitshane ukuthi kanti vele kuyini umdlezane, umdlezane ngowesifazana osanda kubeletha, osakhangelelwe ngelithi umzimba wakhe awukaqini njalo ubuthakathaka akalawo amandla okwenza imisebenzi enzima
Umlizane: ngowesifazana ke lo ogcina usana, akukhathalekile ukuthi unina womntwana uyabe engaphi, izolo kanengi umama womntwana uyabe esemasimini, eyekukha amanzi kumbe eyetheza inkuni. Siyananzelela ngokuguquka kwesikhathi ukuthi kulezi nsuku abalizane sekungamantombazana agcina izindlu ekhangela abantwana lapho onina besemsebenzini, sinanzelela ukuthi kwaguquka ibizo kuphela.
Kubalizane lapha, sinanzelela ukuthi labo balokwehlukana, bakhona abalesandla esihle abathandwa ngabantwana kube khona njalo abanye abazondwa ngabantwana. Okunye njalo okwenza umlizane athandeke yindlela alolozela ngayo lengoma azihlabelelayo lapho ethulisa usana.
