uMthunywa
Tina Apollo Sibanda
NDOBUTJILA kukuli tjedza tjeBuKalanga.
Ndingaba nhu weni wale kuhhe kuko?
Iwe uno mwemwetela kukasununguka malopa mumbili
sendatsambiwa londa nevula inopisa.
Ndobvuma notjila nyenyedzi yangu inopenyelela se tjimonikanyemba.
Andina mawhi akalizana londesedza topokela kuko
tjikundamoyo tjangu.
Iwe wakayengemala moyo senyunyi dzekudzimu
Ngilosi yangu inogala muhango dzimwe dzigala kudzimu.
Ndopfigama mbeli kuko nemeho anahoni
nenguba eyengayila ludo pabugalo gwemihodzi.
Iwe ugele munkumbulo wangu kusina angakudusa.
Nsi ne nsi ndokubona wakanakilila
upinda mbeli kwemeho angu nekene ulikule.
Ndisekelela nditondeka pasina mwe unokubona kuhhe konkumbulo wangu.
Ndilebeleka ndoga sompengo nditi “yeya nyenyedzi yeBukalanga”.
Kana ludo bupengo gunohanganya bakule nakule.
Ngono ndiyani wale angandilambisa bupengo gwangu?
Kana awulambisa mpengo penga nobe uli iwe mpengo!
Ndokukumbula nyenyedzi yangu,
Hhuba langu linopenya lisingapise.
Mwedzi wangu unovoneka usingafe seyimwe mimwedzi.
Kwabe mimwedzi tjose ndisingakubone mwedzi wangu.
Koga ndolila mihodzi yeludo isingabuhikiwe.
Nditi umwe mwedzi ndowoba mwezi uwo mwedzi wangu.
Kalanga Language and Cultural Development Association
[email protected] +263 772 610 726
