uMthunywa
KUNDATSHANA yethu sizakhuthazana ngabathenga lokuthengisa impahla ezake zasebenza, sisithi bazi umthetho we-Second-hand Goods Act Chapter 14:16. Umthetho ochaza ukuba u “dealer in second-hand goods” ngumuntu oqhuba umsebenzi wokuthenga lokuthengisa impahla ezake zasebenza engumnini walezompahla kumbe isisebenzi sakhe kukanti ama- “second-hand goods” wona yimpahla endala kumbe eyake yasebenza egoqela izigqoko lokunye okunjalo kunye legolide elingalolongekanga kumbe amanye amatshe aligugu ayabe ekulesosimo; kumbe insimbi ezenjiwayo ezifana le-iron, lead, copper, tin, aluminium, brass or zinc kumbe impahla elungiswe ngalezonsimbi kumbe ingxenye yazo okutholakale emuntwini ongelacence lokuqhuba umsebenzi wokuthengisa leyompahla.
Lamuhla siqhubekela phambili ngezempahla zako “Khothama”.
Sithe thina, umnini walezimpahla kumbe omsebenzelayo, kumele agcine ibhuku lapho aloba khona zonke impahla azithengisa yokunye lempawu zazo (serial numbers). Ibhuku esikhuluma ngalo lapha bakwethu kumele lilotshwe konke okwenzakala ngokuthengwa lokuthengiswa kwempahla zikasomabhizimusi wako “Khothama” kunye labobonke abanye abathengisa izinto ezindala kumbe ezake zasebenza. Kumele lichaze umhlobo, uphawu, umbala lakho konke okuphawula impahla ethengwa kumbe ukuthengiswa ngusomabhizimusi lo.
Kumele kulotshwe igama lothenga kumbe ukuthengisa impahla zaloluhlobo, indawo kumbe ikheli lapho ahlala khona (hatshi-i-box number) kodwa inombolo yendlu, isitanda kumbe umnini womuzi / usobhuku wakhe / induna yakhe lesigaba sakhe kumbe ilokitshi ledolobho lakhe.
Engabe engumuntu ongathengisa ngalezompahla kodwa ogcinisileyo, ocele ukuthengiselwa kumbe ozitshiyileyo nje, kumele zilotshwe phansi. Ekulobeni indingeko zokukhomba othengileyo, othengisileyo, ogcinisileyo kumbe otshiye impahla zakhe lomthengisi (dealer in second hand goods), kumele alobe usuku lapho aqhube khona lowomsebenzi, isikhathi soqobo lendawo lapho okuqhutshelwe khona lelobhizimusi.
Kumele kubekhona njalo intengo yaleyompahla kumbe imbadalo eyabe ivunyelwene ukuzakhitshwa uma ingabhadalwanga ngalesosikhathi kuqhutshwa lelobhizimusi.
Nxa umthengisi lo kumbe isisebenzi sakhe, sisebenzise eyinye yempahla ethengiswayo, kumele kulotshwe phansi indlela esetshenziswe ngayo, ekhutshwe ngayo kwezinye. Uma inikwe omunye umuntu sasipho kumbe kanjani, kumele kucace konke lokho.
Akumelanga impahla ebithengiswa izolo kumbe eke yalotshwa ukuba ingeyinye yethengiswayo, icine isingasabonakali nje kungelasizatho. Nxa itshontshiwe kumbe kulokunye okwenzakale kuyo, konke lokho kumele kulotshwe phansi kulolugwalo lomthengisi.
Igama lendingeko zonke engiziqambe ngaphezulu, okuphathelane lonikwe leyompahla, kumele kulotshwe ngokufaneleyo.
Ugwalo lolu lumqoka bakwethu. Lugcineni njalo liluqakathekise. Kungabukeka sengathi kuyize lokho esikubonisana lapha, kodwa-ke, sisuke simangale kakhulu sesibona kubotshwa abantu abanengi abagoqela labahlonitshwayo besetheswa amacala okweba kumbe ukutholakala belempahla ecatshangelwa ukuba itshontshiwe. Phela yazini ukuba impahla etshontshiweyo iphanga ithengiswe, isetshenziswe kumbe ifihlwe.
Ngokunjalo, singathakazeleli ukuthenga izinto ezitshiphileyo njalo esingazaziyo ukuba zivelele ngaphi. Ugwalo lolu, kumele lunikwe amapholisa aseduzane lalapho usomabhizimusi lo aqhuba khona umsebenzi wakhe. Lokho kwenziwa ngaloba yisiphi isikhathi lapho amapholisa ayabe ethekelele khona osomabhizimusi labo bezowahlola.
Impahla yonke etholakala ikusomabhizimusi lo ngesikhathi amapholisa efika kumbe kufika bani lobani, ibalelwa ukuba ngeyakhe lowo somabhizimusi.
Thumelani imibono yenu kunombolo yeWhatsApp u – 0783185 092 kumbe ebulenjini ku – [email protected] / [email protected] / [email protected]
