uMthunywa
KUZABE kungabizwa ozwayo eFolosi ngoMgqibelo mhlaka 30 Ntulikazi lapho abanye babacuphi bakuleli (CID) abazabe bephawula khona imikhosi yabo yokuqoqa usekelo lwempahla yokusebenzisa emisebenzini yabo.
Izakhamizi zeFolosi lezethekeli zakulelo dolobho zizakudla ukudla kwamehlo lendlebe lapho elinye lamaqembu abahlabeleli abalodumo kuleli, iNdowane Super Sounds ezabe iqhunsa khona isekelwa ngamanye njalo amaqembu ezemigido, imidanso lokuhlabela. Injongo yale imikhosi yikuqogelela inzuzo yokuphawula ngokusemthethweni inhlelo zomanyano kazulu lamapholisa; ukuqhuba umhlangano wesabelo sonke oweMatabeleland North CCC okhangelelwe ukuqhutshwa mhlaka 14 Mfumfu kunye lokusungula isikhwama sosekelo lwemisebenzi yonke yabacuphi beZRP ama-CID. Inhlelo ezizaphawulwa lezi ngezigoqela iCID Mat North Business Against Crime Forum of Zimbabwe (BACFOZ), iCrime Consultative Committee (CCC) leAnti-Drug Abuse Club (ADAC).
Ekhuluma lentathelizindaba eseHwange kuviki edluleyo, umgcinisihlalo wohlelo lweCID Mat North BACFOZ uMnumzana Vinot Mjibila Ncube uthe inhlelo lezi zizaqala ngomkhankaso wokuphakulela umphakathi amacebo okuvikela ukudalwa kwamacala, ukuwacubungula lendlela zokutshisa “otsotsi.”
Amazwi kaNcube la agcizelelwe nguMgcinisihlalo we CID Mat North CCC uMfundisi Jabulani Dumisani Sibanda othe bajonge ukusebenzisa imikhankaso le njengendlela yokuhlanganyela ndawonye lozulu bebonisana ngamaqhinga okulwisana loCALA kunye lomzali wakhe uSigilamkhuba. Umfundisi uthe bakubone kufanele ukuba ngaphandle kwemithandazo kumele bamanyane lezinye inhlanganiso zomphakathi ezigoqela iEnvironment Management Agency (EMA) leBEAT Aids ekwenqabeleni ukudalwa kwamacala, ingcekeza endaweni esihlala kuzo lezisigqagqeleyo kunye lokumemetheka kwegcikwane le-HIV.
Uqhubeke esithi nxa ingxoxo zenhlanganiso lezi zontathu zingaphumelela, bazasebenzisa ithuba lomkhosi we-CID Mat North Dinner Dance Show yakuqala ozaqhutshwa enkundleni yeChinotimba Stadium ukucanda izitanda zokufundisa ngemisebenzi yabo ukuze isizwe siphungule amacala, ingcekeza lemikhuhlane.
Eminye yemikhosi le izaqhutshwa mhlaka 3 Mpandula enkundleni yeHwange Stadium besekusithi owokucina wenziwe mhlaka 1 Mfumfu eChinotimba Stadium. Emkhosini wokucina lo, kuyabe kukuncane indawo iNdolwane Super Sounds isina idedelana lomkhokheli we-sungura uAleck Macheso.
Mhlaka 1 Mfumfu yikho lapho okuzabe kuvezwa abalenhlanhla, omanqoba kuhluzwa amagama alabo abazangena emncintiswaneni wemivuzo yama-raffle tickets. Imivuzo le igoqela-: 2 nights for 2 including bed and breakfast at five star hotels (Victoria Falls); dinner for 2 at BOMA place of eating; zip line for 2 with Wild Horizons; Sunset cruise for 2 at Shearwaters, Zambezi explorer and Wild Horizons leminye eminengi. Amatikiti la yi$1,00 cha!
Imikhosi le iqala ngo 1 o’clock emini “kuze kuse” njalo imbukiso ekhona ngebalisela phakathi owama jumping castle, owezinja zesipholisa, imiculo lemdanso evela kumaqembu anjengaboKwejani yaseJambezi, Chicken Bus yeFolosi, imbongi uObert Dube weFolosi, iShantani Afro Jazz Band yase Hwange, iGodzo Dance Band yase Tsholotsho, leminye imicimbicimbi. Imihlobo yonke yokudla izabe “ithelile.” Ukungena enkundleni $1,00 abantwana $2,00 abadala.
Abafuna ukuthengisa impahla, ukudla, ukubukisa imisebenzi kumbe ubuciko obuthile lokunye okunjalo phuthumani lixhume uHlahlani Ndhlela ku 0281-30270 kumbe kumakheli alotshwe ngaphansi — $10,00 kuphela. Imikhosi le iqhutshwe ngaphansi kwendikimba ekhuthaza ukuphatheka komphakathi ekulwiseni amacala njalo ikhokhelwa ngumbono othi -: “Icala kaliboli, silicubungula njalonje.” Indikimba yalonyaka ijonge ukulolonga izigaba ukuze umphakathi ube lelihlo elibanzi njalo wengeze ubuciko lolwazi lwawo ezigabeni zonke zakuleli.
Sizalubambela lapha udaba lwethu lwezokulwisana lokudalwa kwamacala sisebenzisa imidanso. Sizaqhubeka ngalo kwelizayo ngoba imikhosi le isaqhubeka kuze kube nguMfumfu lonyaka.
Okwamanje, qhubekani lithumela imibono yenu emapholiseni lisebenzisa izindlela zonke elizenelisayo kunye lenombolo zeWhatsApp:
0785549290 (MBCU Mat North), 0784270800 (ZRP Mat North), 0783185092 (CID Mat North), 0785957764 (MBCU Bulawayo), 0782047834 (Victoria Falls District) kumbe ebulenjini ku – [email protected] / [email protected] / [email protected]
