uMthunywa
SEKUHAMBE uMessi, uRonaldo lo-Iniesta kwasala kudabuke inhliziyo zenengi labandeli babadlali laba ababona amazwe eArgentina, Portugal leSpain ekhutha ugatsha lokuqhubekela phambili ngemidlalo yeWorld Cup eqhutshwa kwele-Russia.
Ukuphela kwesigaba samaqoqo kutsho ukudlula kwesigaba sokuqala se-2018 Fifa World Cup ezaphela mhlaka 15 Ntulikazi enhlokodolobha yaseRussia, iMoscow.
Kusukela uqalile umqhudelwano lo owenziwa ngemva kweminyaka emine, awukho umdlalo ophele kungangenanga ibhola.
IRussia ibalwa lamazwe adlulele esigabeni somkhumulajesi. IRussia ayicini nje ngokubalwa ku-last 8 kodwa iyavela laseluhlwini lwabahlohla amabhola abahamba phambili lapho imelwe khona nguDenis Cheryshev odlala kuVillarreal eSpain.
UCheryshev uphume lamabhola amathathu esigabeni samaqoqo okutsho ukuba ubambana loDiego Costa weSpain.
NjengoCosta, ozalelwe eBrazil, uCheryshev uvule ngamagoli amabili emdlalweni wokuqala.
Laba bobabili balandela uHarry Kane weNgilandi, inkunzi yaseBeglium uRomelu Lukaku, bobabili abalamane ngamunye.
UKane oRonaldo yibo kuphela abasaphume lama-hat trick kulo mqhudelwano. UKane uyitshaye emdlalweni wesibili benquma iPanama ngo 6-1 kanti uRonaldo uyibasele ngomdlalo wokuqala leSpain.
UKane uyabalwa futhi lakuma-brace ngamagoli amabili awatshaye bebhekene leTunisia. ULukaku ulama-brace amabili emidlalweni emibili, uCosta uleyodwa ayitshaye bebhekene leSpain kanti uCheryshev laye uyitholile benquma iSaudi.
Kuzokhumbuleka ukuthi ukunqoba iGolden Boot akutsho ukuthi usuzonqoba iWorld Cup kwazise lango-2014 nguJames Rodriguez waseColombia ohambe phambili ngamagoli ayisithupha kodwa baphuma kuma-quarter-final.
Ngaphandle kokubanga isicathulo segolide, enye inselela ebhekene labadlali abasele eRussia, yikudlula amagoli angu-171 atshaywe eBrazil ngo-2014.
KuWorld Cup edluleyo eBrazil kutshaywe amagoli angu-171 alingana lalawo ahlohlwa ngo-1998 okwaqala ngawo ukuqhudelana amaqembu angu-32 esuka ku-24.
Abakhokhela ngokuhlohla yilaba: U-Harry Kane wase-England (5); Romelu Lukaku waseBelgium (4); Cristiano Ronaldo wasePortugal (4); Denis Cheryshev waseRussia (3) LoDiego Costa waseSpain.
Ababambene ngamagoli amabili ngamunye endaweni yesithupha yilaba;— Yerry Mina waseColombia, Mohamed Salah wase-Egypt, Eden Hazard waseBelgium, Son Heungmin waseKorea Republic, Mile Jedinak wase-Australia, Ahmed Musa waseNigeria, Wahbi Khazri waseTunisia, Luis Suarez wase-Uruguay, Artem Dzyuba waseRussia, Philippe Coutinho waseBrazil, Luka Modric waseCroatia, John Stones wase-England, Andreas Granqvist waseSweden.
