uMthunywa
YiNtatheli kaMthunywa
UMJAHO weOld Mutual Nkulumane lonyaka uzabiza inengi labantu kulandela isimemezelo sokuthi imvuzo ikhweziwe.
Abagijimi abalendumela yokuphatheka kuyo yonke imijaho kuleli abasoke bekele ukuza koBulawayo mhlaka 3 kuNhlangula.
Inhlanganiso yeBulawayo Athletics Board (Bab) eqhuba umjaho lo ithumele umbiko wokuthi umvuzo wakuqala kumango wamakhilomitha angu-21 uyi-$700, kuthi owesibili uyi-$500.
Kuhlandla lalabo abagijima ngama-wheelchair, umanqoba uzabuyela ekhaya ephethe i$500.
Kuminyaka edluleyo umjaho lo ubuncintiselwa i-5km le10km kuphela.
Umgcinisihlalo weBab, uManuel Mpofu uthe sekulabantu asebeqalisile ukubhalisa ukuphatheka kulumjaho.
“Nxa ufuna ukugijima kumele ukhiphe i$5 kuphela. Lonyaka umjaho wengeziwe ngoba sekule-21km. Umvuzo uqansile njalo,” kutsho uMpofu.
“Sibonga inkampani ye-Old Mutual ngosekelo lwayo isikhathi sonke. Inhloso ihlala ingeyokuthuthukisa umdlalo wethu, sinikeze labasakhulayo ithuba lokuthi bazibonakalise emphakathini, “ kutsho uMpofu.
Ukuqhutshwa kwemijaho emide koBulawayo kulumnyaka kutshintshe igiya. Leqembu leHighlanders libike ukuba lizakwenza umjaho walo wokuthakazelela ukufikisa kweqembu iminyaka engamatshumi ayisitshiya galo lunye lanye.
UMpofu uthe kungumbono wakhe ukuthi idolobho lenze imijaho eminengi okuyikhona okuzavuselela lumdlalo, kuphakamise lesisindo sedolobho kubavakatshi.
Inengi labagijimayo abavela koBulawayo liyehluleka ukuphatheka emincintiswaneni ephezulu ngenxa yokuthi abenzi kahle.
Ngomnyaka ophelileyo, uCanicious Nyamutsa nguye owanqoba umango we-Old Mutual 10km ngemva kokunqoba ezinye intshantshu zokugijima ezibalisa uJacob Mugomeri ogijimela iZimpost loMisheck Sithole.
Kuhlandla labomama kwanqoba uBertha Chikanga.
Lakhathesi kwehlula ukuthi kunqobe abagijimi abaphuma koBulawayo lakwezinye indawo kulumhlubulo welizwe.
