uMthunywa
YiNtatheli kaMthunywa
USAZIWAYO kwezenguqu koBulawayo uSiphambaniso Dube ongumaqhuzu weqembu le-Ajax Hotspurs ubike ukuba usetshiyane lezenguqu.
Ngemva kweminyaka esebenzela ukuphakamisa umdlalo, uDube uthe kasiboni isizatho sokuthi abambelele ngoba sekufuneka ingqondo ezintsha ukuze inhlelo zenguqu yakoNtuthu ziyephambili.
Uthe sekumele kungene umthanyelo omutsha.
UDube odume ngelithi ‘Spha’ kunguqu ukhethe ukuvalelisa esekhasini lakhe leFacebook lapho abike khona ngeviki edluleyo ukuthi usejikele amajogwe phansi.
“Sekuyisikhathi sokuthi ngivalelise iZifa. Isikhathi sami sesedlule njalo kufuneka umthanyelo omutsha, olengqondo ezilamacebo amatsha azanceda umdlalo koBulawayo. Bekukuhle kuloluhambo, kusukela ngisacathula njengomkhokheli. Ngibonga bonke abangincedisayo,” kutsho uDube.
Ukusuka kukaDube kube ngumbiko okhalise abanengi kunguqu ngoba akula obecatshangelwa.
Ebuzwa ngabangane bakhe uDube uthe isizatho esikhulu sokutshiya kwakhe yikuvulela indlela abasakhulayo.
“Amacebo amatsha kumele asetshenziswe. Ngisuka ngisiyaphumula, mhlawumbe ngizaphenduka ukuzosebenzela iZifa.”
UThamsanqa Pricka Ncube uthe kaboni ukuba kulomuntu ongavala isikhala esitshiwe nguDube.
“Kusinwa kudedelwana.”
UDingulwazi Masuku uthe uDube nguye yedwa owayeletha isithunzi kwezobukhokheli kunguqu.
“Ubalelwa kulabo abenelisa ukunikeza iZifa isithunzi. Manje nxa usutshiya labalutshwane abaseleyo abenza lumsebenzi ngothando bangatshiya, kuyahle kube semahlangeni. Sibonga umsebenzi omuhle. Usaziwayo kwezokusekela inguqu uIsaaz Mbedzi uthe: “Ungahamba kuzabe kumasinyane…”
Isikhulumi seZifa uXolisani Gwesela uthe ulethemba lokuba uDube uzaphenduka.
“Ngikufisela inhlanhla mfowethu kodwa ngizwa sengathi umdlalo usakudinga.”
