uMthunywa
Kalasikhathi lami uhlala ekuWhatsApp
KHULU ngithemba ukuthi uqine saka. Ngilenkinga engifisa ungixazululele yona ngoba lami iyangidida. Umkami uthanda ifoni kakhulu loba esidla uyabe elokhu eyigodlile ebhala okuzincwajana efonini kasila sikhathi sokuxoxa ngitsho. Nxa ngingambuza uthi kungani ngilenkinga locingo lwakhe. So izolo ngimbuzile futhi ngefoni saxabana ngaze ngamtshela zonke nje inhlamba ngingakhethi ngoba inhliziyo yami ibibuhlungu. Khulu khonokho udobhe imbodlela wayibulala wathi ufuna ukungibulala abe sezibulala. Khulu kungabe kusitshoni lokhu ngoba kangimzwisisi ngitsho. Mina ngibona angani nxa sibabili kumele sixoxe.
Impendulo
Ngiyabonga mzukulu, ngiqine njengensimbi njengoba thina sizinsimbi ezindala. Mzukulu ngokubeka kwakho udaba lwakho, ngibona angani kukhona okungaphansi komlaza kuyo. Kutsho ukuba kulesibungu esiyimpehlane ekuhlaleni kwenu. Kuyadingakala ke mzukulu ukuba ungavuki ngolaka nxa ulungisa izinto. Akudingeki mzukulu ukuba ucitshe umlilo ngephalafina. Awungeke walungisisa umkakho ngokumtshela zonke inhlamba. Kuyadingeka ukuba uzehlise, nxa ulungisa indaba ezinje. Abesilisa banjengabantwana mzukulu, bekezela woba lesineke umkakho laye uzayibona indlela atshiyane lomakhalekhukhwini wakhe. Nxa lisehluleka ukulungisa udaba lwenu libabili, kuhle lixoxe lezihlobo eziseduze ukuze ziliqondise kulinto, kuyimfanelo ukuba lixoxe sibili ukuze lilungise ezomuzi wenu kunye lempilo yakusasa. Hatshi ke mzukulu xoxani ngalokhu hatshi ukufaka ulaka phakathi.
Intombi yami ayifuni ukuya emacansini
Khulu ngithemba uziphilele. Mina ngifuna ukuhlangana lentombi yami kodwa yona kayifuni ngitsho lokuzwa ngendaba yokuhlangana emacansini. Uhlala njalonje esithi ngingavele ngilinge ngikhulume ngendaba yocansi sizahle sehlukane. Khulu ukuganga uyaganga sibili. Pho walelani ukuthi sihlangane. Ngilemizwa lami sengidubekile, ngenzeni ukuze ngixekane lesilingo lesi.
Impendulo
Ngiphilile mzukulu wami. Awusatshongo phela ukuthi isilingo yintombi yakho kumbe yimizwa. Awubekanga egcekeni iminyaka yakho kunye leyentombi yakho, okwenza kubenzima ukuqhoba ithambo lakho. Angikuzwisisi mzukulu lapho usithi ‘Ukuganga uyaganga sibili’. Uganga lobani mzukulu yena eyintombi yakho, njalo wena ubufakazi ubuthatha ngaphi, ngicela ubeke kuhle udaba lwakho mzukulu, ukuze lami ngithole indlela yokukuncedisa. Ngibone futhi ukuganga okutshoyo ukuthi ngokwemacansini kumbe hatshi. Kanti yena lomntwana engahamba esibasemacansini nje aphinde abeyintombi yakho njani? Hatshi beka kahle indaba yakho mzukulu.
Kafuni ukuba labantwana lami
NGITHEMBA uqine saka Khulu ngilendoda esengithandana layo efuna ukuyangivelela ngenyanga kaMabasa. Uhlupho engilalo yikuthi yena kafuni sibe lomntwana sonke. Yena ulabantwana ababili mina ngiloyedwa kungakho ngifuna omunye. Ngithini Khulu ngoba sengize ngicabanga ukwehlukana laye.
Impendulo
Ngiqinile mzukulu, izulu kuphela lalela phezulu. Esintwini bathi uma ababili asebezele eceleni bethathana kuba kuhle uma bethola, igazi labo elibahlanganisayo endlini. Xoxisana lowangakwakho mzukulu ngokuqakatheka kwalokhu njalo langesifiso sakho sokuba lengane yakhe. Ukuba lengane kubonisa ukuhlaliseka komuzi wenu phela. Ungaphangi wenze isinqumo mzukulu, bonisanani njalo zama ukusibonisa lesihlobo sakhe esiseduze asithembayo, ukuze laso simnyenyezele ngale into aze atshintshe umqondo wakhe.
Ngingabe sengilegcikwane na?
Khulu kuyenzakala yini ukuthi nginindwe igcikwane lengculazi ngokulala lomuntu kanye. Khulu ijaha engisanda kuthandana lalo nginanzelele ukuthi linatha amaphilisi ama-ARV. Ngemva kokuhlangana lalo emacansini ngisele endlini lona selisiya emsebenzini yikho lapho engibone khona amaphilisi kanye lebhuku lakhe lesibhedlela. Khulu ijaha leli beselibeke ilanga lokuyavela ngakithi. Ngithini?
Impendulo
Lokhu kubonisa ukuba ujaha wakho lo, kathembekanga. Abezempilo kunye labomdabu baqakathekisa ukuba abantu baphumelane egcekeni bengakahlangani emacansini kodwa yena ukhethe ukungathembeki. Lokho mzukulu sekukuwe ngoba usulazi iqiniso, nxa uzimisele ukuba uyamthanda ujaha wakho okwempela qhubekelani phambili. Zikhona izindlela zokuzivikela emacansini, lilakho ukuyabona abezempilakahle, libachasisele ngesimo senu lobabili, bazaleluleka ukuba liziphathe njani, uma lisakha umuzi lawe ke mzukulu sekudingeka ukuba uzakwenza njani ukuze ujaha wakho abekwazi ukuba ususazi isimo sakhe. Lokhu kufanele ukwenze ngendlela engasoze ibulale uthando lwenu, kodwa ezalufukamela.
Ungibize ngebizo elinga yisilo lami sisemacansini
Linjani Khulu ngibhala incwadi le umoya wami udabukile. Sengileminyaka emihlanu ngithethwe ngumkami olesikhundla esihloniphekayo esontweni. Umkami ulomsebenzi omuhle futhi. Mina lami ngiyasebenza kodwa ngilaso isikhathi lomkami. Khulu kuviki ephelileyo ngithe ngilele lomkami wangizwisa ubuhlungu obuphindiweyo ngoba ungibize ngebizo lomunye umama esisonta laye. Khulu imizwa yami yonke yahle yaphela, yena wavuka wahlala nje wabamba ikhanda. Kangizange ngikhulume laye kuze kufike lamhlanje. Ngenzeni Khulu ngiyebuza lowo mama kumbe ngiyebikela abadala. Ngicebisa Khulu.
Impendulo
Mzukulu, akulunganga ukuhlala lomuntu efuthelene ngaphakathi, khulula umoya wakho, likhulumisane lomkakho. Yoniwa ngomlomo iphinde ilungiswe ngawo phela. Indlela oyibeka ngayo indaba yakho, ibonisa ubuhle lokubukeka kwenhlalo yenu, ngaphandle kwale impukane ewele echagweni. Beka umoya wakho phansi mzukulu, ukhulumisane lomkakho umvezele konke okungaphakathi kwakho ngalesisenzo njalo umuphe ithuba lokuba laye akuvezele konke ngalo umama. Kwesinye isikhathi ungathola ukuba lokho okucabangelayo ayisikho, kwabayisehlakalo nje, umyeni wakho njengomphathi wayecabanga ngezimvu zakhe, wasecina ephumisela ekubiza ngebizo lezinye. Ngibona angani mzukulu indaba yenu isesengeyaphakathi kwemduli yenu kuphela. Awungeke uhle uyebikela abadala kumbe uyebuza lowomama ngoba umkakho awukamnikezi ithuba lokukulandisela lingehlulana usungaba lakho ukudlulela phambili ungabulali imizwa yakho mzukulu ngento ongakabi leqiniso layo. Ngokwenza lokhu uzachitha umuzi wakho omuhle kangaka.
