uMthunywa
SEKUBIKWE ukuba nxa umqeqetshi weHighlanders uMadinda Ndlovu efuna ukuthi iqembu lakhe linqobe, kumele abize uThomas Chideu loPrince Dube.
Abadlali bobabili bake bayitshibilikela iHighlanders anduba bayihlamukele besiyadinga amadlelo aluhlaza eSouth Africa.
UDube usedlalela iSuperSport United loba nje elisubula ibhentshi. UChideu uzamile ukuma kuGolden Arrows kodwa kukhanya sekuphelile okwakhe kwele-South Africa.
Ngesimo sesikhwama seHighlanders, uDube angeke aphenduke. Kumaviki adluleyo abalandeli beHighlanders bagcwalise amahemuhemu okuthi uDube uzaphenduka. UMthunywa ulandele udaba lolu kwatholakala ukuthi umdlali kuzakuba nzima ukuthi aligqoke njalo ijesi leTshilamoya.
Okwamanje ukukhefu ngoba isizini ye-Absa igqitshiwe njalo kukhangelelwe ukuthi aphindele eMzansi ngemva kwenyanga.
Abafakazi abaqotho abancwebe uMthunywa indlebe babike ukuba uMadinda uyabadinga abadlali abakubanga likaDube loChideu ngoba ebona ukuthi iqembu lakhe lingadliwa nsukuzonke.
Kubikwa ukuza kwabadlali laba yisifiso sakhe njalo bahugwe yikuzwa ukuthi uMadinda udinga umgadli.
Ngendlela umqeqetshi lo adinga ngayo umgadli kuveza ukuthi uyakubona ukuba uzazondisa abalandeli ngenxa yokungahlohli kwabafana bakhe.
Kuzwakele ukuthi kulengxoxo ezithile phakathi kwe-Bosso loChideu loba iwofisi yalithimu ingafuni kuvele emphakathini.
Umfakazi othembekileyo oseduzane lethimu wazise ukuba kusukela ngeviki eledluleyo, uChideu ubetshitshela emawofisini eqembu.
“UChideu usekhona. Uyalolonga kodwa kakabi ngumdlali weHighlanders. Bakhona abamfunayo, singazi kumbe umqeqetshi ukhona kulokhu,” kutsho lumfakazi oseduzane leBosso.
UMthunywa uzwe ukuba uChideu uyifuna ngabomvu indawo kuHighlanders.
“Iqiniso yikuthi lumdlali uyafisa ukuphenduka. Usakhula ngakho ngeke kwenze ukuthi ahlale phansi.
IHighlanders ingaphuza, umdlali lo uzasayinwa ngamanye amaqembu,” kuqhuba umfakazi othembekileyo.
Ebuzwa ngalokhu, uChideu uphange wacima ifoni yakhe.
Kusenjalo inqotshiwe iHighlanders ngempelaviki nge 1-0 liqembu leFC Platinum. Ukudliwa kwayo kuyitshiye ikunombolo yesithupha kulogu yeligi yeCastle Lager.
