uMthunywa
ZONKE izabizwana zokukhomba ziqala ngongwaqa u – l -. Ungwaqa u – l – uvela kusakhi sokukhomba u –la.
Ukwakhiwa kwesabizwana sokukhomba eduze
Isabizwana sokukhomba eduze sisakha ngokusebenzisa isakhi sokukhomba u – la. Lesi sakhi siqala ngaso eziqalweni zamabizo. Isibonelo: (la + umu- ), umu- yisiqalo samabizo akusigaba 1. Unkamisa ka – la ulumbana lonkamisa wokuqala wesiqalo sebizo. L(a + u)mu > lo(mu-) = lo. Unkamisa a ulumbana lonkamisa wokuqala wesiqalo sebizo u (u) kudaleke u (o) kanje: a + u = o.
Nxa kulabomankankane esiqalweni sebizo bayasuswa kanye lonkamisa olandela umankankane lowo, kanje: Kusigaba 1, la + umu = lo(mu) = lo oyisabizwana sokukhomba eduze.
Ukwakhiwa kwesabizwana sokukhomba buqamama
Izabizwana zokukhomba buqamama zakhiwa kuzabizwana zokukhomba eduze. Ezabizwaneni zokukhomba eduze ezilelunga elilodwa u –lo lo –la, sijobelela u –wo. Kusigaba 1, kusabizwana sokukhomba eduze u – lo sijobelela u –wo. Kusigaba 4, kusabizwana sokukhomba eduze, u –le- sijobelela u –yo.
Ezabizwaneni zokukhomba eduze ezilamalunga amanengi sisusa unkamisa wokucina besesijobelela u – o. Izibonelo: Isigaba 2a lab(a) + o = labo. Isigaba 7 les(i) + 0 = leso.
