uMthunywa
Silo Ophezulu SthintaKundatshana yethu elesihloko esithi, Incwadi evela ejele sinanzelela ukubaluleka kwalesisihloko lapho sesiqathaniswa lalesi sehlakalo esimqoka. Phezu kwemizamo yonke eyenziwa ngabazali bakaSimangaliso ngesifiso sokwenzela umntanabo okuhle ukuze abe lekusasa elikhanyayo isibongo kwaba yiyo lencwadi eyayivela ejele yiso isibongo abasitholayo indodana yabo isimotshe konke ngokuzithola isejele ngemva kokwenza icala elilihlazo kangaka elokutshontsha.
Kwandile ke kwabasakhulayo ukuthi bayengane ngezinto ezikhanya emehlweni okwesikhatshana kukanti azilakhi ikusasa yomuntu. USimangaliso uzithola nje esephelelwe ngumsebenzi abesewukhangele ekolitshini lababalisi ngenxa yokuyengwa ngosowabo ukuba bathenge impahla zokuzibonakalisa.
Yisifundo esikhulu ukuthi umuntu kahlale njalo aneliswe yilokho alakho okusemandleni akhe hatshi ukuzibamba ngamandla kulokho angakwenelisiyo.
Intsha kayinanzelele ukufaka abazali engxakini ezifana lalezi ngoba kungokunye okubavuselela izifo lezinyalo ezingapheliyo bangabe besaba lawo amandla okuqhubekela phambili
Siyananzelela njalo ukuqakatheka kothando emulini. UMaDlomo uyalimala evele esehlala loSikhakhane sebevele sebengumdeni. UMaDlomo kasenelisi ukubhekana lezapho lokuba ngumama lapha ekhaya sehlala nje engoleleyo.
Konke lapha sekubhekane loSikhakhane kusukela ekuphekeni ukugcina iguma kanye lokuhlamba impahla. Kazange akhathale kodwa ngenye imini izinto zizamlungela yilo uthando olugcina imuli ndawonye lolu. Lomlandu wokuba ngumzali uqakatheke okwamagama ukuthi lilungelo lomzali wonke ukuselela umdeni.
Kubazali kuqakathekile ukuthi ngazo zonke izikhathi bahlale phansi labantwababo baxoxisane labo ngempilo kanye lezilingo abalokuhlangana lazo. Yikho nje lesitsho sabadala sisitsho ozeleyo ulomlandu.
Kungenzeka umntwana asinde kuzilingo ezithile ngokulonda umlayo awufunjathiswa ngabazali bakhe kuthi lowo oyabe ekhethe ukuhamba ngeyakhe indlela lapho sekumtholile uyazisola ngokukhumbula umlayo awuphiwayo njengoSimangaliso osekufika konke emqondweni wakhe ukuthi abazali bakhe babevele betheni aze athembise lokuqhubeka ngempilo eqotho.
