uMthunywa
Silo Ophezulu Stinta – Ngeviki elidlulileyo sitshiye kungathi kulendaba ethanda ukusolisa lapho uFanyana esefikile ekhaya wafica kulezethekeli angazilindelanga angakhangelelanga ngitsho lokuhlangana lazo. Kwakuyizethekeli ezisolisa uqobo ezazi lapha ekhaya. Pho zazilandeni yiwo umbuzo omkhulu.
Laba bangane bakhe ababili kwakungu Wax lo Qhude. Babecaca nje ukuthi ngabantu abangagqize qhakala bonwabile nangu uWax wayehlezi eqethukile phezu kwesofa ukuhlala okuveza ukudelela kanye lokusweleka kwenhlonipho. UQhude yena wayehlezi esihlalweni esiseduze letafula elokhu edlali dlalisa lesiya sigqoko sakhe esimhlophe kungathi wayefisa ukuthi uFanyana lo asinanzelele kakuhle asikhumbule futhi lalapho ayesibone khona. Owangakwakhe yena wayelokhu engomileyo ezama ukuthulisa umntwana owayelokhu ekhala.
Kwathi ngelikade wavuleka uQhude wazisa uFanyana ukuthi babemvakatshele loba nje kungazange kubekhona ukubingelelana. UFanyana laye wazama ukuphosa owakhe ebuza ukuthi pho singabe sasikhona na isidingo sokuba bamsuse ngesimnyama kangako. UQhude lowo wawunzima umbuzo kaFanyana kwangathi wayengawuzwanga. Wamdumela ngomunye laye embuza ngelokuthi waye zifuyile na inkukhu. Lowo mbuzo ke wawungacaci kuhle ukuthi wawuvele ujongeni. Kucaca ke yena uFanyana wayemazi qotho uQhude ukuthi ngumuntu owayeqala esoma ajinge nje sekuyizibhakela kungathi bekudlalwa.
UFanyana laye wazama ukubuzisisa kunina ukuthi amuphe na lo muntu inkukhu le ayicelayo. Unina laye waphendula ngelokuthi kuleso simo wayengalawo atheni. Waqonda ngasesilugwini senkukhu uFanyana lapho aphenduka egodle iqhude. Lalapho esiyadinga leyo nkukhu kazange ahambe yedwa waphelekezelwa nguWax.
Mhlawumbe laba bantu babelokhophe lokuthi uFanyana lo wayengasuke anyamalala ebunyameni.
Ekungeneni endlini wazibongela ngelilo khophe uQhude echaza lokuthi yiyo kanye leyo eyayifanele yena.
Wabuye njalo waqonqosela ukuthi kuvalwe umnyango lo ukuze leliqhude lingaphumi. Okungasaziwayo ke yikuthi iqhude elivalelwa lapha yinkukhu kumbe kugadwe yena Fanyanandini lomdeni wakhe yilaba babili.
