uMthunywa
Olwalotshwa ngu B D Ndlovu
SIQHUBEKA ngendaba yethu yempi yenkululeko lapha esicine khona umumo ungamanga kuhle kulobuhlungu obunzima phakathi kwezakhamizi sibabona begcwala iganga kubalekwa kabuhlungu.
Kuthi nje oMzila besamangele babona inkalakatha yomuzi indlu yakhona eyayithungelwe ngomlilo kusobala nje ukuthi indaba zazimbi ngaleyomini. Kweminye imizi imigigo yayilokhu yatshiywa ihlonyiwe ezingigeni kusobala nje ukuthi abantu beNkosi babona kufiwa bathi nyawo ngibeletha batshiya imithwalo yonke, imbiza lazo zatshiywa zibondwa. Konke lokhu kwakuyibufakazi obukhulu bobunzima izakhamizi ezazikhangelane labo.
Impilo yayilumela okwenkobe zamatshe, phakathi kwamakhaya kwakungasahlaleki izakhamizi zasezihlala egangeni zisidla lamanqe, kubuhlungu-ke ukucabanga ngezingane ukuthi zaziphila njani zona kulelo hlathi.
Kwakungelula ukuthi izakhamizi zitholwe yizitha ziphakathi komuzi.
Baqhubeka ngohambo lwabo bethuswa lilangabi lomlilo elabonakala liphakama phambi kwabo komunye umuzi. Kuthi belokhu besamangele bezwa kuthutsha inkalakatha yomsindo emva kwabo, sasingekho isikhathi sokuthalaza ngaphandle nje kokuthi bacatshe lezikhali zilindile. Kwabonakala kuthutsha amakhulukhulu amasotsha esitha egaxe ephelele phezu kwamabhiza, kwasekusobala nje ukuthi kwakunuka ukufa indawo yonke lelolanga.
Abafana beganga bayifunda ivaliwe ukuthi leyo yayinkulu, kwakungadingeki ngitsho lokuthi bayihlokoze inyoka le isemlindini, bacandama bathula zwi. Babona nje kuphakama amalangabi omlilo phakathi kwemizi lapha okwakusobala nje izakhamizi zazisidla luklubhu, ngalelo langa isitha sasingena ngolaka lwenyoka.
Balala-ke kulezo zixuku oMzila balinda ukusa.
Kwathi nje kusithi nwee bangena igusu elimnyama elesabekayo baphendla eyabo indlela. Basebephakathi kobunzima obukhulu ngempela ngoba inhlamvu zabo zasezinlutshwane okwamagama, zazingeke ngitsho zimelane lesitha loba sekutheni.
Bangena indlela baqhubeka ngohambo. Endleleni lapha bahlangana labanye babo ababelimele kakhulu besopha igazi ngendlela ebuhlungu. Mhlawumbe laba bantu babehlangane lembila zithutha ngaleyo mini njengoba lesitha sasizula okokhozi ngobusuku obedluleyo.
Siyabona ngeqiniso ukuthi kwakunzima okwamagama, kungakhathalekile ukuthi lisotsha, yisakhamuzi, ngumntwana, kwakufiwa, igazi lalichitheka okwamagama. Kwakudingeka nje umuntu olesibindi kanye lokuzinikela kweqiniso, umuntu owayesiyamela ilizwe lakhe ngenhliziyo yokukhulula isizwe.
