uMthunywa
P Mpofu
Ugwalo — Ugqozi Lwezimbongi
Isihloko senkondlo — Ukwenda Akutshayelwa Amathambo
ISIHLOKO sale inkondlo siyisaga kumbe amazwi ahlakaniphileyo.
La amazwi akhulunywa ngowesifazane osehlangane lohlupho emendweni wakhe esekhala ngokuthi aluba ubesazi ukuthi lapho azakwendela khona kulohlupho ubengeke akwenze lokho.
Aluba kwakuthi nxa umuntu esiyakwenda aye emhlahlo ayetshaya amathambo wayezakuya khona ukuthi ahle atshelwe ukuthi lapho ayakwendela khona kunzima, uzahlupheka wayengasoze azihluphe ngokuya lapho.
Pho njengoba kungatshayelwa amathambo lokho kwenda wazifumana esephakathi kobunzima yikho-nje lumama sekhala ethi, “Ukwenda akutshayelwa amathambo.”
Isimanga yikuthi lo owesifazana wende kuhle kungelakuthwala nzima kodwa ngesiphangiphangi izinto seziguqukile usebuza kusithandwa sakhe abebethandana kakhulu ukuthi woneni.
“Sithandwa ngoneni bantu? Kona ban’okungelaxolo na? Kade sithandana kukuhle, Lamhla kuthen’ungibulala bo?”
Kasakuzwisisi lo owesifazana ukuthi kona bani okungela xolo? Kukhanya umyeni wakhe kasafuni kumxolela ngokona kwakhe lokho.
Uyaveza owesifazana ukuthi bebethandana lomyeni wakhe kakhulu kodwa lamuhla umyeni wakhe usembulala. Umyeni wakhe usemtshaya lo owesifazana okwenza abuze ukuthi sekutheni kanti.
Konke bekukuhle kuze kufike khathesi. Izingane zabo zinengi zandile.
Ezinye izingane zabo sezendile okutsho ukuthi labo sebekhulile, isimanga-ke yikuthi sekwenzenjani umama lo esehlukuluzwa khona sekuyisikhathi sokuthi aluba sekulokuthula lokuhlaliseka lapha ekhaya.
Izingane zabo zandile kanye lenotho yabo umama lo uthi yandile. Usebuza owesifazana ukuthi pho sekumele atshiye konke lokhu na?
Uyabe esesebenzele ize phela kufane lezithukuthuku zenja zona okuthiwa ziphelela eboyeni. Umuntu uyahamba lenja yakhe esiyazingela.
Avuse inyamazana inja iyigijimise ize iyibambe ngemva kwesikhathi eside isize yaginqa.
Nxa umnikazi efika lapho uyayixotsha eyithathela inyama sekuzakuthi ekuyihlinzeni inja ithole okungamaqatha okungatsho lutho inyama yonke ithathwe ngumnikazi.
Iyabe isisebenzele iphutha-ke leyonja izithukuthuku zayo seziphelele eboyeni ingasazuzanga okuyangaphi hlezi isale ilambile futhi.
Ngendlela efanayo owesifazana lo nxa ebona uthando solusolobela seluphela yena esesebenze kakhulu kangaka wagcwalisa imuli egumeni kanye lenotho isinengi.
Nxa esesuka uyabe esesebenzele ize ngoba uzaphuma atshiye konke aphume engela lutho.
Amandla akhe ayabe eseyize sekufana nje lenja egijimise yabamba inyamazana kodwa yacina ixotshwa iphiwe okuzinyama okuyingcosana umnikazi athathe yonke inyama.
Uyaphambili ezifanisa lesikhukhukazi sona esifukamela amaqanda kanti sidliwa yibutata, sona sisithi sivikela amaqanda aso.
Kodwa usevuma lo umama ukuthi lanxa kunjalo akunani ngoba lephimpi, inyoka, ingasiluma, “ingasigeca, akunani.”
Kuyabe kungelandaba lanxa iphimpi lingasigeca isikhukhukazi lesi sona sifukamele amaqanda aso.
Usebona lumama ukuthi nxa uthando luphela lapha useyaduka, aduhe lezwe, enyanyeke abeyisifinyo esicicima ingcekeza.
Owesifazana nxa esesuke ekwendeni ngokwaliwa ubesenyanywa endulo yikho umama lo esezifanisa lesifinyo esicicima ingcekeza.
Usesuka ahambe lelizwe esengowenyanywa ngumhlaba wonke, engasela sithunzi.
