uMthunywa
UMGIJIMI weleSouth Africa uCaster Semenya ukhale ngaphansi ngesikhathi i-International Association of Athletics Federations (IAAF) imemezela intshantshu zesiqubu ezinhlanu ezedlule ezinye lonyaka.
NgoMvulo i-IAAF imemezele abadlali okuyibo abacine besele kwabangu-15 eyayibakhiphile obekumele bavotelwe ngumphakathi lekhomithi ethile.
Kucine kusale uDina Asher-Smith umpetha wase-Europe ku-100m le-200m, uBeatrice Chepkoech ophule irekhodi le-steeplechase aphinde abe ngumpetha ku-IAAF Diamond League, kukhona loNafissatou Thiam ongumpetha wase-Europe ku-heptathlon futhi okunguye odle ubhedu nyakanye.
Umcimbi wokwethula abanqobileyo useMonaco mhlaka 4 kuMpalakazi.
USemenya akazange alibone elidlalayo kanti usanda kuhlonitshwa kuleli ngeSports Personality of Year, Sportswomen of the Year leSports Star of the Year.
Unqobe igolide kuma-Commonwealth Games ku-800m laku-1500m.
Udle ubhedu ku-IAAF Diamond League laku-IAAF Continental Cup.
USemenya akaze ahlulwe ku-800m kusukela ngo-2015.
Kwenzeka lokhu nje lumgijimi ulindele isinqumo se-Court of Arbitrations for Sport (CAS) njengoba ephikisa umthetho omutsha we-IAAF efuna abagijimi besifazane imizimba yabo ekhiqiza i-testosterone ephezulu kulesikalo esijwayelekileyo, badle amaphilisi okuyinciphisa.
Lumgiijimi odabuka eLimpopo wathi umthetho lo ulokucwasa ngokobulili futhi awulabo ubulungiswa.
Kuthiwa abagijimi abesesimeni sakhe ngeke besavunyelwa ukugijima ku-400m, 800m le-1500m nxa kuyikuthi abasoke bawadle amaphilisi.
Ekhuluma labakwa-Discovery, uSemenya wathi akasazilweli yena kodwa ulelwa isizukulwane esiza emuva kwakhe.
Kulindelwe ukuthi isinqumo se-CAS sikhitshwe ngoMbimbitho.
Nxa isinqumo singavumi kungenzeka azithole ephazamiseka ekuvikeleni isicoco se-IAAF World Championship engoMpandula eDoha eQatar ngomnyaka ozayo. — Ubulembu
