uMthunywa
YiNtatheli kaMthunywa
OSAMABHIZIMUSI besabelweni seMatabeleland North sebekhuthazwe ukuthi basukumele phezulu bathathe ithuba lemidlalo yamaYouth Games alonyaka ukwenza imali lokuncedisa ukuqhutshwa kuhle kwemidlalo le.
Imidlalo yamaYouth Games izaqhutshelwa edolobheni leHwange kusukela mhlaka 17 kusiya ku-27 kulinyanga.
Umphathintambo wezemidlalo kuHulumende uMakhosini Hlongwane uthe imidlalo le inikeza osomabhizimusi ithuba lokuthi bakhankase amabhizimusi abo ngakho kubalulekile ukuthi baphatheke kuwo.
UHlongwane ubengumhlonitshwa kumkhosi wokuvula imidlalo le okusemthethweni ngoLwesihlanu oludluleyo.
Imidlalo le izabiza abadlali abedlula i-15 000 leziphathamandla ezifika i-3 000. Lonyaka imidlalo yabasakhulayo izagoqela labadlali bamakolitshi, amapholisa, amasotsha labe-Zimbabwe Prison and Correctional Service.
Phezulu kwalokhu, iMat North ngeyokuqala ukuqhuba imidlalo le ehlelwe kakutsha ngokungezwa kwenani lemidlalo kusukela ku-8 kusiya ku-22. Kuzancintiswa kumidlalo ebalisa ukugijima, i-basketball, i-boxing, i-chess, ikhilikithi, ukutshova amabhayisikili, ama-darts, inguqu, i-golf, i-handball, i-hockey, i-karate, i-netball, i-pool, i-rowing, i-rugby, i-shooting, i-swimming, i-table tennis, i-tennis, i-volleyball le-weightlifting.
“Nxa sikhangelisisa inani labadlali abazatheleka eMat North, sizanzelela ukuba kuzabuya abantu abanengi. Leli lithuba elihle lokwenza imali. Ezemidlalo zinikeza imali ezinengi umhlaba wonke jikelele ngakho akube njalo laseMat North.
“Osomabhizimusi abasukumele phezulu ngoba akulamcimbi wemidlalo omkhulu njengala,” kutsho uHlongwane.
Umaqhuzu wohlelo lwama-Youth Games ka-2017 uBurzil Dube ubike ukuba bakhangelele ukuthi imidlalo yalonyaka ihlabuse njalo njengabaqoqi sebeleqiniso lokuthi sebelungiselele baphelela.
