uMthunywa
Nkosilathi Sibanda
INGCITSHI zenguqu uMichael Essien, uChristopher Katongo loDidier Drogba kubikwa bazadlala kuleli kulumnyaka.
Abadlali laba kubikwa bazakhethwa kuqembu elikhangelelwe ukuphatheka kumidlalo yokubonga uBenjani Mwaruwari phakathi kwalumnyaka enkundleni yeNational Sports eHarare.
UMwaruwari watshiya ukudlala inguqu yamazwe esesengukaputeni wamaWarriors. Nguye okubikwa uqoqe lumdlalo ngoba ethi ufuna ukubonga abadlali asebenza labo umhlaba wonke jikelele.
Ngaphandle kukaDrogba, Essien loKatongo, abadlali abazingcitshi abanxusiweyo nguKalusha Bwalya owake wadlalela iZambia osengumgcinisihlalo weFootball Association of Zambia.
Abanye ngabeSouth Africa uBongani Khumalo, loSteven Pienaar, uSamba Sow (Mali), uEl-Hadji Diouf (Senegal), uKolo Toure (Cote d’Ivoire), uAlex Song (Cameroon), uYakubu Aiyegbeni, uNwankwo lo Chris Kanu (Nigeria), uSully Muntari (Ghana) loEmmanuel Adebayor (Togo).
Ezadlubhedu ezikhangelelweyo ngunozinti uBruce Grobbelaar, uAndy Cole (Ngilandi), uLucas Radebe (South Africa), uAustin “Jay Jay” Okocha, uDaniel Amokachi loRigobert Song.
UBenjani wacina ukudlalela iqembu lamaWarriors kumdlalo wokukhankasela ukungena kuAfcon leCape Verde. Umdlalo lo waphela kungutshiki lobhanqa 0-0.
Ekupheleni komdlalo wakhe, uBenjani ubike ukuba uzasungula isikhwama semali ezaphathisa abasakhulayo abalethalenta lokudlala inguqu.
Ebika ngamalungiselelo alumdlalo ekukhuluma loMthunywa ebulenjini, umgadli lo uthe: “Njengoba ngatshiya ukudlala inguqu yamazwe ngo2010, umdlalo wami uzabe uyikuvalelisa abalandeli bami.
“Abangane bami bonke bayazi ukuthi angisadlali inguqu yamazwe, yikho bevumile ukuzodlala lapha. Amalungiselelo aqhuba kakuhle, lokho engilitshela khona akusoke kwatshintsha.”
Uthe kuyisifiso sakhe ukuthi ahlanganise bonke abadlali ayelabo kumathimu awadlalelayo abalisa iLulu Rovers, iHighlanders, iUniversity of Zimbabwe, iAir Zim Jets, iJomo Cosmos, iGrasshoppers, iAuxurre leSunderland.
