uMthunywa
ABADLALI beqembu lenguqu yeSouth Africa, iBafana Bafana kubikwa selicele inhlanganiso yeSouth African Football Association (Safa) ukuthi lidlale lamazwe elakhelane lawo njengomzamo wokwehlisa udlame kulelolizwe.
ISouth Africa ibhekane lodlame lokubulawa lokuxotshwa kwezizalwane zamazwe eAfrica ezihlala kulelo.
IBafana izodudulana leZambia leZimbabwe, amazwe alenqwaba yabadlali abagijima eNingizimu Afrika. Amanye amazwe iSafa ezaxoxa lawo yiMozambique leMalawi.
Phakathi kwabadlali abadabuka kulamazwe abagijima emaqenjini amakhulu singabala uWillard Katsande weKaizer Chiefs, Khama Billiat, Cuthbert Malajila loKudakwashe Mahachi beMamelodi Sundowns.
Iphephandaba, Isolezwe, libika ukuba abafakazi balo abasemahofisini eSafa bathe inhlanganiso le ithumele isitatimende lapho eveze khona ukuthi ihlose ukuhlela imidlalo emibili lamazwe angomakhelwane ukuzama ukuqeda ukuhlukunyezwa kwabokufika eNingizimu Afrika.
Ukuhlasela sekudlule lemiphefumulo yabantu bakuleli labokufika abangu-12.
“Ngenxa yokuthi udlame ludlangile eThekwini, eminye yemidlalo emikhulu izolethwa khona,” kutsho umthombo weSolezwe.
Lokhu kuza njalo kulandela ukunanzelela kweSafa ukuba inguqu yeSouth Africa iphethwe ngabadlali abadabuka kwamanye amazwe eAfrica.
Umdlali we-AmaZulu uJohn Arwuah, usanda kubika ukuthi bake basikaza ukuyozilolonga enkundleni ngoba besesaba ukutshaywa.
NgoLwesithathu oledluleyo, baphose batshiya izimota zabo bahamba ngebhasi yeqembu ngesikhathi uSuthu luthela othulini iPolokwane City ngo 2-0 ePrincess Magogo Stadium, KwaMashu.
“Sifuna ukusebenzisa imidlalo emibili yobungane ezahlanganisa izwekazi le-Afrika. Okwenzeke kulezi zinsuku ezedlule kusitshiye sonke sitshaqekile futhi sibambe ongezansi,” kutsho isikhulu esiphezulu seSafa uDennis Mumble.
Omunye umdlalo kubikwa uzadlalwa eDurban lapho okutshiswe kwaxotshwa inengi labo abaphuma phandle kweSouth Africa.
Isolezwe lithinte uDominic Chimhavi ukuqinisekisa ukuthi ngabe omunye wemidlalo ohlelwe yiSafa uzodlalelwa eThekwini yini.
“Sizokhipha isitatimende nxa sesiqede konke. Ithimba leSafa lizohlangana kulimpelaviki ukuzodingida amazwe esizodlala lawo lezindawo okuzodlalelwa kuzo.
“Sikholwa ukuthi eNingizimu Afrika silabadlali abanengi abadabuka emazweni angomakhelwane esizokwazi ukuthumela umyalezo ngabo ukuthi kasihambisani lalolu dlame. Phela kubalulekile ukuthi sikutshengise lokho iBafana isazoya kodlala emazweni angaphandle emidlalweni yokuhlungela i-Afcon leChan. Iqembu lethu lika-Under-23 lisazoya kodlala imidlalo yokuhlungela ama-Olympic Games (azoba seRio de Janeiro, eBrazil, ngonyaka ozayo) lamazwe ase-Afrika,” kutsho uChimhavi. — Isolezwe
