uMthunywa
YiNtatheli kaMthunywa
ISIZINI ka-2018 ayizange ihube ngendlela ayifunayo uBekithemba Ndlovu umqeqetshi weBulawayo City esanda kukhitshwa kuligi enkulu.
Umqeqetshi lo ophinda akhuze iqembu lesizwe kumdlalo kanobhutshuzwayo kuqula lama-Under-20, ulakho ukuthi akhuthalele ukunqoba kumncintiswano wenkezo yeCosafa ezadlalwa eZambia ngoMpalakazi.
Ngokunjalo, uNdlovu ukhethe abadlali azahamba labo kulumncintiswano lapho okumele atshengise ukuthi loba exotshwe kuligi yeCastle Lager, uyenelisa ukukhuza abafana bama-Under-20 banqobe.
Umncintiswano weCosafa lo uzaqhutshwa kusukela mhlaka 6 kuMpalakazi kusiyafika umhlaka 16 wenyanga efanayo.
Phakathi kwabadlali laba kulabadlali abagijimela amaqembu angaphandle kwelizwe uMunashe Garananga oweUbuntu Academy ese-South Africa loMalvin Sibanda owe-Taft Head Boys Varsity.
Ekhuluma lephephandaba likazulu uNdlovu, umqeqetshi wama-Young Warriors uthe ukhethe abadlali encedisana labasekeli bakhe njalo imibono yabo ivela ngemva kokuhlolisisa isimo sabadlali kanye lembali yabo yokudlala kulisizini.
Uthe kuyisifiso sakhe ukuthi baqalise ngokuphangisa ukungena enkambeni yokulolonga.
“Sikhethe abadlali laba esikhangelele ukuthi sibalolonge anduba siphume leqembu elizancintisa eZambia,” kutsho uNdlovu.
Kuzancintisa amazwe alitshumi lambili. Isizwe seZimbabwe siphathi kwequla elibalisa iLesotho, Namibia leAngola.
Amanye amazwe asemhlubulweni ongezansi yelizwe azadlala yiZambia, Uganda, Malawi and Swaziland, South Africa, Mozambique, Egypt leMauritius.
Ithimu kaNdlovu ngokugcweleyo:
Onozinti: Issah Ali (Yadah), Frank Kuchineyi (Herentals), Prince Kashiri (Chicken Inn), Panashe Nyabunga (Ngezi Platinum.
Imvimbi: Andrew Mbeba (Highlanders), Brendon Mpofu (Ndlovu Inyathela), Munashe Garananga (Ubuntu FC), Kuzivakwashe Mudima (ZPC Kariba), Emmanuel Jalayi (Aces Academy), Kudzaishe Dzingwe (Talen Vision), Nyasha Garai (Bulawayo Chiefs).
Abasesiswini: Tinashe Siziba (Shabanie Mine), Macdonald Mukunga (Harare City), Emmanuel Ziwocha (Harare City), Tatenda Tumba (Harare City), Eddie Chitavanei (Bulawayo Chiefs), Phineas Mutsetse (Chapungu), Douglas Mapfumo (Legends Academy), Devin Mhindiriri (Bulawayo City), Kelvin Ndebele (Caps United), Tinotenda Chiunye (Caps United), Blessing Nyamuzihwa (ZPC Kariba), Tatenda Muringani (Dynamos), Leonard Jani (FC Platinum), Kundai Mukweva (Aces Academy), Privilege Mugandani Alburaak, Marvin Sibanda (Taft’s Head Boys Varsity).
Abagadli: Thabo Lunga (Highlanders), Delic Murimba (Triangle), Mandlenkosi Mlilo (Ngezi Platinum Stars), Blessing Sarupinda (Black Rhinos), Clive Rupiya (Chapungu).
