uMthunywa
Ophezulu Stinta – Kundatshana elesihloko Uhambo Olumnyama satshiya indoda yesigqoko esimhlophe kanye lemota ebomvu, igama layo lingu Qhude icela usane lukaMazibuko ukuba alusingathe ukuze athambise inhliziyo yakhe. Kwakunzima okwamagama kuMazibuko ukunikeza lesi sigebengu usana aluthanda ngenhliziyo yakhe yonke. Wabuye wacabanga indlela umuntu lo aqamula ngayo ucingo ngelanga eledlulayo, kwakungazange kumhambe kuhle.
UQhude laye wayekubona ukuthi owesifazane lo wayethithibele okwamagama, aze atsho lokuthi ‘lengane ingaba wusizi kini. Ingaba wusizo nakimi ngokuthambisa eyami inhliziyo’ yinkulumo enzima ngoba kakho loyedwa owayekwazi ukuthi wayezoyithini ingane le emva kokuyiphiwa.
UFanyana wayesesaba okwengwenyama isandla sik Qhude ngoba esazi mhlophe ukuthi silolunya. Wazincenga uMazibuko wayiqhuba uQhude wayamukela qede wayisingatha esifubeni sakhe wazula zula layo endlini. Ngokuphazima nje kwelihlo wayeseyibeke phezu kwetafula ingane yamufulathela waqala ukumbambatha isiphundu sayo.
Besathuthumale waqhaqha ngolaka ibhatshi elimhlophe, wakhupha ngaphakathi inkafula kufa, wavele nje wayibeka esiphundu sengane wathula kwangathi wayethi khulumani ngilalele. Indlu yonke yathi vuthu ngonganani umkhosi. UWax yena wayevele nje engagqize qhakala. Wahwabha okwezulu uQhude ebathusela umsindo kulapho anikeza khona uFanyana ithuba lokukhetha phakathi kwezinto ezimbili. Lapho kwasekumele abeke phansi imali yalaba bantu kumbe ubuchopho bengane buchaphakele phansi.
Wazincengela ngelihlengezela inyembezi uFanyana wathembisa lokuthi babengavele nje bamhambise lasemapholiseni. UQhude wavela waphendukela ngakuFanyana watsho kwaba kanye ngenkafula kufa yakhe wahle nje wathi thwitshi umfoka kaMadlela kwahle kwaphela okwakhe emhlabeni. Ingane yona yasala yona izidlalela etafuleni yayibonani pho. Kuyisifundo esikhulu ke ukuthi umuntu kufanele agcine izithembiso azenza ebantwini angaze wazicabangela yedwa. Kukanti futhi icala kaliboli akukhathalekile iminyaka mingaki kodwa ngenye imini kuzamele kuphendulwe imibuzo. Siyagcwaliseka njalo lesihloko sendatshana esithi uHambo olumnyama loluhambo aluzange ngitsho lumcacele uFanyama kwasekuqaleni lwaze lwamtshiya ekufeni.
