uMthunywa
Ophezulu Stinta – Silokhu siqhubeka ngogwalo lendatshana yethu elesihloko esithi sona uhambo olumnyama. Kulendatshana sitshiye uFanyana engumuntu ophuthuma ucingo olungazange lumchazele lokuthi kwakutheni. Ulokhu ekhathazekile ngaloluhambo. Umtshayeli wetekisi wayeseze wafika bangena endleleni.
Ikhona indaba yemota ebomvu kuloludaba okokuqala uFanyana wathi esondela kuyo ezama ukuyacela inyawo ezilula yavele yasuka yahamba. Okwesibili sebesendleleni ngetekisi bavele bayifice endleleni imile ntsi kulowomgwaqo ababehamba ngawo. UFanyana wazama ukukhangelisisa umtshayeli wemota le kwaba ngumnyama ke ukuthi ambone ngoba wasuke wavalwa luthuli. Laye wabuye waziduduza ngelokuthi wayezikhathazelani ngabatshayeli bezimota ezibomvu nje, loba nje kwakukhona okwakunuka santungwana ngayo imota le. Yafika ezitolo itekisi wehla uFanyana kwasekumele aqedise uhambo lolu ngenyawo lapho indlala kanye lamadino kwasekuzithathela. Akukho ayengakwenza wayingena indlela.
Eseqhubeka ngaloluhambo lwakhe wezwa nje umdumo wemota endleleni lapha wavele wema eceleni ngethemba elikhulu lokuthi wayezayimisa athole ukusizakala. Hawu kwase kungathi ngumhlolo ke lowo. Ngokwesithathu kwasekuyiyo njalo imota ebomvu lapho wazama ukuyimisa waze waguqa langedolo kodwa phinde yavele nje yedlula ichitha. Wasala emangele laye uFanyana ukuthi kodwa umtshayeli ololunya kangaka wayengowangaphi.
Wafika ekhaya sekuhlwile uFanyana lapho uvalo lwaselumtshaye lwameqa waqonda kwezinye yezindlu zalapha ekhaya wafika waqoqoda kwangazwakali muntu ngaphandle nje kosana olwaluhlaba umkhosi ngaphakathi endlini lapha. Waqoqoda kodwa kakho owamvulelaya waze wazivulela yedwa.
Wangena endlini lapha wathola abantu bekhona kungathi kulindwe yena. Pho yinindaba laba bantu babengamvumeli eqoqoda kangaka. Wazizwa nje laye exega amadolo loba nje wazama ukuziqinisa njengendoda. Wazibuzisisa ukuthi babefunani laba bantu lapha. Waphendulwa nje ngunina owathi kahlale phansi abangane bakhe bamlindile. Kulapho okwathi dlwe emqondweni kaFanyana esebona isigqoko esimhlophe phezu kwetafula kwakuyiso lesiya sigqoko asibona emoteni ebomvu kambe ngumuntu owayemlandela lo emelusile.
