uMthunywa
Ophezulu Stinta
SESIKHANGELA ukuphetha kwendatshana elesihloko esithi UBhuku. Sitshiye uMfiliji esakhamise owangaphansi lapho uMashandu ethutsha ediyazela ebudlile engagqize qhakala. Lapho sethe qaqabu utshwala bonke bathi dlwe uvalo lwamtshaya waphose wawela phansi esebona uMfiliji.
Zehla inyembezi, kwathi tha kuMfiliji wabona nje ukuthi ngeke amlahle umkakhe lokumthanda wayelokhu emthanda esabubona lobuhle bakhe obukhangayo loba nje impawu zotshwala lazo zaseziziveza kuye lapha. Wananzelela ukuthi wayengasazithwalanga uMashandu wathi dlengelele nje uMfiliji sekufika umcabango womntwana. Wabuza ukuthi ingane-ke yona yayingaphi ngelokufisa ukuyibona.
Umbuzo wengane wamethusa uMashandu owaphuthaza umhlane wakhe okohlanya kodwa lutho nje ukuyithola ingane emhlane wakhe. Yena uMashandu wayevele nje egave udaka emadolweni akhe isiqiniseko sokuthi lapho ezama ukuchapha wawela kulolodaka okungaziwayo ukuthi waphuma njani ichibi lodaka loba nje kwakufakwe ugodo lokuchapha kwakuchapheka nzima kakhulukazi emuntwini odle amabele njengoMashandu. Lapho uMfiliji efika kuleyondawo okuchatshwa khona akhangwe ngamatshudutshudu lapho okwakuwele khona uMashandu, kwakusobala ukuthi wayengalubonanga ugodo lokuchapha.
Wathalathalaza uMfiliji kuleyondawo ngokwethuka wabona imbeleko eluhlaza khona kanye lapho okwakuwele khona uMashandu, lapho uvalo luhle lumdabule phakathi kudume ekhanda esezibuza ukuthi pho kuyini lokhu akubonayo, ingane yayingaphi imbeleko igiqika edakeni?
Kwakungeneka nzima udaka lolu lutshona okungesindaba yokudlala. Wafika nzima lapho okwakulembeleko, kulodaka kwakucaca ukuthi kukhona ulutho olwaluwele lapho kulegodi thize. Wafika lapho eseqhuqhe okwamagama wafaka isandla kuleyondawo wezwa nje ukuthi kwakukhona okuthile phakathi lapha wabamba ngesandla sakhe wakhupha lokho okwakuphansi, isimanga esinganani isandla saphuma lomntwana. Yiyo eyawela kuloludaka, ngokusweleka kwenhlanhla ingane yayisithule, okucaca ukuthi yayisidlule emhlabeni. Yayingaba yini phakathi kodaka olwaluqanda mo ubusuku bonke, konke kukhokhelelwe yisenzo sotshwala.
