uMthunywa
IMBONGI iloba linkondlo iphakathi kwesithuli hatshi lesi esijwayelekileyo esibangelwa luvalo kodwa esayo sibangelwa ngumzwangedwa. Kulento emdlayo emoyeni njalo izwiwa nguye yedwa. Iyadinga iyaphelelwa imbongi iswela lokuthi ingenzenjani ngalowo mzwangedwa. Isimanga salumzwangedwa ubangelwa yintombi ayidingayo alokhu engayiboni yona eyamthembisa angakwaziyo.
Ingwabungwabu yesithembiso leso kwenza imbongi ibelesifiso sokuthi ithubele ihambe lomhlaba isiya lapho engazi khona. Imbangela yakho konke lokhu yinto ezwiwa nguye yedwa umzwangedwa. Ithi lanxa isicabange ukuzila kumbe yinyama leyo emnandi kodwa izwe itshaywa luvalo. Iyayibikela-ke leyo ntombi imbongi ukuthi iyintombi yomzwangedwa. Yintombi eyicabangayo imbongi leyo. Lolo gcuma lentombi eyicabangayo lulolongwe ngamafutha amahle.
Nxa ikhumbula ngaleyontombi imbongi ibalesizungu kubengathi ibizungeleza. Ithathekile imbongi ngaleyo ntombi yomzwangedwa okwenza ukuthi nxa ibona ezinye intombi lanxa ziwatshila amahle amaqolo, zikhazimula kungathi ziphuma elwandle olugcweleyo kodwa yena umoya wakhe ubambelele kuleyo ntombi yakhe yomzwangedwa. Lokhu kuvezwa yila amazwi:
“Noma ngibabon’oThokozile laboNtombenkulu, bewatshila amaqolo, bekhazimula sengathi baphum’ olwandl’ olugcweleyo, Wen’uyikuqala lokucina, Emoyeni wami.” Iyabuza-ke imbongi ukuthi kambe ngubani ongayihlomulela kundaba yayo lentombi yayo yomzwangedwa? Ilukhuni lindaba yembongi lentombi yayo okwenza adinge ukuhlonyulelwa ukuze babone ilizwe elihle lapho okungeke kufike muntu khona.
Imbongi isithatha intombi yayo yomzwangedwa ithi kabahambe bobabili babuke lezo ntethe zomhlaba, lezinyoni emagatsheni, lasemikhiweni ethelileyo. Baqhubeke bebuka lezinhlanzi emanzini amhlophe wona engadungwe lutho.
Nxa kusenzakala konke lokhu iyabe ibuka umzimba wentombi yakhe yomzwangedwa wona omi amadidiba amabele.
Iyawuzwa umoya wentombi yayo uma iphefumula izwe lokukhudumala kwawo lanxa konke lokhu kukumzwangedwa wayo.
Kumzwangedwa wayo imbongi izwa ubunanjana bokunukanyana kwentokozo yamathe ayo. Iyayibikela intombi yayo imbongi ukuthi kayizenzi kodwa yenziwa yilokho eyakuthenjiswa yiyo leyo ntombi yomzwangedwa. Ukwenza kwayo imbongi ithi abantu sebesithi iyahlanya kodwa yona njengoba isazi isizatho esenza iziphathe ngaleyondlela ithi kayihlanyi. Abanye sebeze besithi yadliswa kanti yona ikhathazwa yintombi yomzwangedwa.
