uMthunywa
Nkosilathi Sibanda
NGOKUVULWA kwezikolo kulithemu, kuqalwe njalo amalungiselelo emincintiswano yokugijima ngesikhathi sokuvele imibiko emihle ethi inkampani yeNestle Zimbabwe Healthy Kids izaqhubekela phambili isekela imincintiswano le.
Usekelo lwenkampani yeNestle Zimbabwe seludonse iminyaka eyedlula emihlanu, okuyikho osekuphakamise izinga lomncintiswano wokugijima ezikolo kanye lokubeka ithemba kuthalenta lomdlalo.
Inhlanganiso yabaphathi bezikolo ze-primary i National Association of Primary School Heads (Naph) ibambene lenkampani yeNestle ibika ukuthi izaqoqa imncintiswano le kuzabelo zonke.
Esabelweni seMatabeleland North, amalungiselelo okugijima aseqalise ezikolo. Iphephandaba likazulu lixhumane lababalisi abaqeqetsha abantwana abagijimayo kuziqinti zeMatabeleland North iBinga, Nkayi, Tsholotsho, Umguza, Hwange, Lupane leBubi.
Izikolo ezinengi zibika ukuba sezigijimela phambili ngoba zihlose ukubusa kumincintiswano yalonyaka.
Umgcinisihlalo weNaph esabelweni seMat North uCharles Ndiweni uthe okwakhathesi iziqinti zonke ziphitsheka ngokulungisisa okuthile kumathimu azo.
UNdiweni uthe kulumnyaka, iziqinti zonke zeMat North zizabuthana kumncintiswano omkhulu ozaqhutshelwa eTsholotsho.
Lonyaka kubikwa imidlalo ye-physical education egoqela le-gymnastics izabe ikhona njalo.
“Iziqinti zethu zonke ziyadibana esigabeni seTsholotsho. Sikhangelele ukuthi amathimu wonke kuziqinti eziyisikhombisa atheleke eNyathi mhlaka 10 Mbimbitho ukuze senelise ukuqala umncintiswano mhlaka 11 kusiya ku-12 Mbimbitho.
“Umdlalo we-gymnastics ophuma kuzifundo ze-Physical Education uzancitiswa njalo ngabantwana abangaphansi kweminyaka engu-11 yokuzalwa.”
UNdiweni ubonge kakhulu ukuphathisa kohlelo lwe-Nestle Healthy Kids ngoba usuguqule indlela izikolo eziphatha ngayo umdlalo wokugijima.
Uthe abantwana abanengi sebevuleke amehlo ngokuqakathekisa ithalenta lokugijima kanye lokukhuthalela ezempilakahle.
“Inhloso yalumncintiswano ngeyokuthi abantwana bavuselele amathalenta abo, ayiwo azabaphilisa kwelakusasa.
Nxa begijima bencintisana kanje kubumba ubudlelwano obuhle labanye abantwana bakwezinye izikolo. Imidlalo yokugijima izaphathisa njalo ukuthi bafunde ukugcina imizimba yabo,” kutsho uNdiweni, owaziwa kabanzi ngobukhokheli bakhe kwezemidlalo kuzikolo zeMat North.
