uMthunywa
Nkosilathi Sibanda
LIPHENDUKILE kunguqu yamadoda kuligi ephakemeyo, okwenza lomqeqetshi walo uNation Dube azitshele ukuthi uzawagijimisa aze avume amanye amaqembu nxa edlala egumeni leHwange Colliery.
Umqeqetshi weHwange lo usebuthanise iqembu elilabadlali abangaziwayo, inengi labo eliphuma kulelidolobho.
Ukholo alalo uDube yikuthi abadlali laba bafuna ukubonakala ngoba abakaze balugxobe enkundleni zePSL kukanti njalo ukudeleleka kwabo kubanikeza idlabuzane.
Kusele iviki elilodwa ukuthi kuvulwe isizini yalonyaka njalo iHwange isike yahlangana leHighlanders yayinqoba kumidlalo emibili ngempelaviki edluleyo.
Ekhuluma lentatheli, uDube uthe wonke amaqembu abazadlala lawo enkundleni yeHwange azagijima ahawule engatholi lutho.
“Angila mazwi amanengi ngaphandle kokuthi iHwange iqine saka. Siphenduke kuligi ukuzoncintisela inkezo hatshi ukwengeza inani lamaqembu. Ngendlela esilungiselele ngayo isizini le, kuzafiwa, ikakhulu ekhaya lethu,” nguDube lo.
Akulamuntu ongamsola uDube ngokuzikhukhumeza kwakhe ngoba ithimu le ilungiselele isizini ngokuzotha, njalo akula okwaziyo ukuthi iphetheni.
Kumalungiselelo ayo, ikhethe ukuphakamisa abadlali abakumathimu abadlali abasakhulayo labanye abangela dumo.
Kwandise ukuthi iChipangano ithenge abadlali abavela kwezinye indawo kodwa kubikwa lokho akuyincedi.
Isinqumo esikhona esivela kubasekeli lenkokheli zethimu yikuthi iChipangano idlalelwe ngabafana abaphuma eHwange kuphela.
“Ithimu iqine kakhulu ngoba sengiyilungiselele yaphelela. Indlela iHwange ezaphenduka ibukhali ngayo, izaphaphamisa amaqembu akade eyidelela,” kutsho uDube.
Kodwa, ngokuhlolisisa umdlalo walithimu kumasizini ambalwa adluleyo, kutholakale ukuthi iHwange ibiqalisa kuhle, yehluleke isizini isiyaphutsha.
Inkinga zeHwange zijwayele ukuhlasela kusigaba sesibili sesizini.
Imbali iveza ukuthi iqembu lilahlekelwa yimiklomelo ngalesisikhathi loba iqalise itshisa.
“Abadlali bayazi ukuthi ukuwa kwethimu yikuwa kwamabizo abo,” kuqhube u Dube.
Abafakazi abaqotho kuleliqembu bathe inkokheli zaqonqosela uDube ukuthi enze okusemandleni akhe ukuthi anqobe ngoba engaswela umsebenzi.
