uMthunywa
Pumulani Mpofu
INENGI labantwana nxa licabanga abantu abangabathathisa incwadi zokuzalwa lisuka licabange ogogo, omama omncane, omam’omdala kumbe abazawabo.
Kukalutshwane ukuthi abantu bacabange ngomalume. Kudala omalume babeqakathekile kakhulu ngoba phela yibo ababetshiyelwa abantwana nxa odadewabo sebethe babalabantwana bengakatshadi. Babebatshiya bondliwe ngomalume kuze kuthi nxa sebethathelwa incwadi zokuzalwa ubaba abe ngumalume womntwana ngoba omalume babekubona kuqakathekile njalo kusipha odadewabo kanye labazukulu babo isithunzi.
Kuliviki ngike ngaxoxisana lobaba wakoNkomo uSenzangakhona. USenzangakhona nxa elandisa udaba lwakhe uchaza ukuthi ungumbalisi ofundisa ngaphandle kwelizwe leZimbabwe njalo wayezalwa lentombi ezimbili uJanet loSophie yena enguye yedwa ijaha. UJanet wazala abantwana ababili phambi kokuthi edlule emhlabeni.
Abantwabakhe bobabili wababelethela endlini njalo wathi eqeda kubeletha wahle wasiwa esibhedlela lapho aphiwa khona ama-health card. UJanet ngesikhathi ebhubha wayesendele eTsholotsho okuyikho lapho abhubhela khona.
Njengoba uSophie wayelokhu ehlulukelwe ngokwedlula kukadadewabo emhlabeni wayengafuni lokuthi ayekhulumisana labakwabozala kaJanet ukuze azi ukuthi basebemthathele incwadi yokufa kumbe hatshi.
Njengoba kwasekwedlule iminyaka eyisithupha uJanet wedlula emhlabeni labantwabakhe uThomas loJosphat sebesesikolo incwadi zabo zokuzalwa zasezifuneka kodwa umama omdala wabantwana uSophie wayelokhe ebambe isikhwili engacabangeli abantwana bomfowabo. Abantwana labo babengasahlalisekanga ngoba babengasenelisi ukuthi bahambe kunhambo zesikolo kumbe ukuthi bayegijima kumincintiswano lezinye izikolo. Lomphathisikolo wayesesithi ufuna incwadi zokuzalwa. UJosphat wakubona kungcono ukuthi axoxele umalumakhe ngodaba lwabo njengoba wayesesekhona elizweni ukwenzela ukuthi axazulule loludaba ngoba phela lwaselumvimbezela amaphupho akhe okugijima aze aphumelele njengabanye abantwana.
USenzangakhona wakubona kungcono ukuthi abhekise amabombo eMoyeni ukuze ayekhulumisana labakwabozala kaJanet babonisane ukuthi babengenzani ukuthi abazukulu bathole incwadi zokuzalwa. Njengoba babengalobolanga abakwabozala bakoJanet abakoNdebele bachaza ukuthi bona abazange bathathe incwadi yokufa kukaJanet ngoba babesesaba ukucalwa nxa sebesuke bayithatha leyoncwadi abangakibo bengekho.
USenzangakhona wahamba wayakhulumisana losobhuku walesosigaba wasembhala incwadi eyayichaza ukuthi uJanet wayebhubhele esigabeni sakhe. Incwadi le yiyo uSenzangakhona ahamba layo esesiyathatha incwadi yokufa kukaJanet emahofisini eTsholotsho.
Loba nje kwabalula ukuthi athole incwadi yokufa kukadadewabo kwasuka kwabanzima ukuthi aze athole incwadi zokuzalwa zabazukulu bakhe ngoba babezalelwe endlini. Waba lenhlanhla ngoba ama-health card abantwana ayekhona njalo echaza ukuthi abantwana bazalelwa endlini unina wasebahambisa esibhedlela. Umfakazi owayekhona uJanet ebeletha njalo okunguye owambelethisayo laye wayekhona futhi elesithupha.
USenzangakhona wabona kungcono ukuthi ayekhulumisana lokhansila ukwenzela ukuthi babonisane ukuthi wayengamncedisa njani. Ukhansila lo wayengumuntu ozwisisayo wasembhalela incwadi echaza ukuthi abantwana bazalelwa esigabeni sakhe. Yiyo incwadi uSenzangakhona ahamba layo esesiyabona u-Sister-in-charge ekilinika onguye owambhalela incwadi eyayichaza ukuthi abantwana babezalelwe endlini kodwa uJanet wayebuya engabeletha eletha umntwana ukuthi azohlolwa. Wathi eseqede lapho wayesesiya khulumisana lomphathisikolo ukuze abhale incwadi eyayichaza ukuthi abantwana bangena esikolo bengelancwadi zokuzalwa.
Eselencwadi kakhansila, ekamphathisikolo eka-Sister-in-charge, incwadi yokufa kukadadewabo, ama-health card abantwana, incwadi kaSenzangakhona yokuzalwa, incwadi yokuzalwa kukaJanet kanye lomfakazi olesithupha babhekisa amabombo emahofisini kaHulumende ukuze bayethathela abazukulu bakhe incwadi yokuzalwa.
Lakanye uSenzangakhona wazithola incwadi zokuzalwa. Abazukulu bakhe uJosphat loThomas sebekhona kuPopulation Register yeZimbabwe njalo sebengama-citizens eZimbabwe ngokugcweleyo. Kumnandi ukuba lomalume.
Asihlanganeni ngeviki elizayo.
Umlobi ungamthinta kukheli ethi trinityproject6@gmail .com, loba kunombolo zocingo ezithi 0773 195 055, ungabona njalo imisebenzi yethu ku www.trinityproject.biz
