uMthunywa
Yintatheli kaMthunywa
KULANDELA ukuza kosekelo lwemali kumdlalo we-pool elizweni lonke, inhlanganiso yeZimbabwe Pool Association isikhankasela ukuthi izabelo zonke zibumbe amaligi acacayo.
Abadlali abasedolobheni leHwange sebebumbe ikhomithi ezabona ngokuqhutshwa kohlelo lokuvulwa kweligi. Kubikwa amathimu azaphumelela azaqhubeka aye kuligi ephakemeyo, edlalelwa zintshantshu eziphuma kuzabelo zonke.
Umdlalo we-pool kusabelo seMatabeleland North usadedela emuva okwenza ukuthi abadlali bakulindawo bengatholi ukuncintisa kuzigaba eziphezulu.
UDewa Kondo obona ngezokuthuthukiswa kwe-pool eHwange uthe iqembu elizakhokhela ukuvuselelwa komdlalo lilamalunga angamatshumi amabili.
Uthe uhlelo lwabo luzaqalisa esabhabha seRaylton eHwange laselokitshini leNgumija, lapho okugcwele khona abadlali be-pool abangela maqembu okudlalela.
“Sihlanganise amakhanda sabona ukuthi kulicebo elihle ukuvuselela umdlalo wethu. Sifuna kubeleqembu labadlali abancintisa kuligi edibanisa intshantshu zonke eZimbabwe.”
UKondo uthe umdlali munye ngamunye kumele abhadale i$2 ngenyanga nxa efuna ukuncitisa kuligi le. Uthe phezulu kwalokhu, kuzabhadaliswa i$5 yokuthi amathimu abesemthethweni kumincintiswano yabo.
