uMthunywa
YiNtatheli kaMthunywa
ABAQEQESTHI bomdlalo wethenisi koBulawayo sebekhuthazwe ukuthi baphatheke kumakhosi amatsha okuqeqetsha umdlalo lo ukuze kulolongwe abadlali bohlonzi kulumnyaka.
Isikhathazo lesi sivele kunhlanganiso yeBulawayo Metropolitan Tennis Board esibike ukuba loba bekhona abaqeqetshi abazama ukuzimisela kulumdlalo, kuzamele bathuthukise ulwazi lwabo.
Inhlanganiso yeBMTB ithe isinanzelele ukuthi idolobho lakoNtuthu alilabaqeqetshi bohlonzi njalo kugcwele labo abasacathula.
Unobhala weBulawayo Metropolitan Tennis Board uThesly Mufunda ubikele uMthunywa ukuthi sebelungiselele ukungenisa ekilasini abaqeqetshi abatsha, ikakhulu abasemalokitshini lapho okuzafundiswa khona ngenguquko esikhona kuthenisi.
UMufunda uphinda abengumqeqetshi weGirls College koBulawayo.
Abaqeqetshi abadingwayo kubikwa bazancedisa ukulolonga abadlali abancinyane lokucebisa nxa sekukhethwa amathimu amakhulu.
“Inhloso yethu kuloluhlelo yikuthi sengeze abaqeqetshi labadlali abaphuma emalokitshini. Sizama ukwengezelela ulwazi lwabaqeqetshi ukuze bengasaleli emuva ngoba ithenisi isiguquka.”
Uqhubeke wathi: “Asazi ukuthi sekwathini kuthenisi yakoBulawayo? Sibonile ukuthi akusizi ukuthi sifundise emasebhabha lapho okuvele kulenkundla lempahla zomdlalo.”
Uthe emalokitshini kulabantu abanengi abalethalenta okokuthi kungadingwa abaqeqetshi abanengi, ithenisi yakoBulawayo ingaphenduka kusimo sayo sakudala.
UMufunda ukhuthaze intsha yakoBulawayo ukuthi isebenzise ikhefu lezikolo ukuthola ulwazi ngalumdlalo.
“Ngesikhathi sekhefu langempelasonto zonke, abantwana lalabo abafisa ukuqeqetsha ababuye ngobunengi babo ukuzofundela ithenisi.
