uMthunywa
YiNtatheli kaMthunywa
IZIMBABWE Olympic Committee ibika ukuthi nxa umdlalo wokuqaga uzaphumelela lonyaka kumele udlalelwe enkundleni zakoBulawayo, ngaphandle kwalokhu akusoze kubelengqubekela phambili kulumdlalo.
Inhlanganiso yeZoc isikhiphe umbiko wokuthi kuzo zonke inkundla zalumdlalo, ezakoBulawayo yizo ezalungiswa zafana lalezo ezakwamanye amazwe ajwayele ukuqhuba imincintiswano yaphezulu.
NgoLwesibili, uAdmire Masenda umongameli weZoc utshele iphephandaba likazulu ukuba uxoxisane lenkokheli yeZimbabwe Netball Association uAgnes Chioora wamazisa ukuthi ahlakaniphe ngokuqhuba imincintiswano eqakathekileyo enkundleni zeWhite City.
UMasenda uthe iWhite City ilenkundla ezinikeza abadlali ithuba lokuthi baphakamise isisindo sabo kanye lokujwayela ukunyathela inkundla elohlonzi.
Inkundla zokuqaga eziseWhite City zakhiwa ngesikhathi iZimbabwe iqhuba imidlalo yabasakhulayo eyeAfrican Union Region 5 Under-20 Youth Games.
“Ngixoxisane lomama uChioora mayelana lokuthi kumele imidlalo yenhlanganiso yabo idlalelwe koBulawayo. NgangikoBulawayo ngesikhathi samaYouth Games ngakholisa engakubonayo. Inkundla ze-netball zinhle okumangalisayo. Ubuhle bazo yikuthi zifana lalezo esizibona emazweni azingcitshi kulumdlalo.
“Umdlalo lo uthakazelelwa ngabantu abanengi. Sakubona sikoBulawayo ukuthi kulosekelo olukhulu lwezemidlalo.
Angiboni enye indawo yokuphakamisa umdlalo lo ngaphandle kwakoBulawayo. Leyo indaba ngiyiqonqosele,” nguMasenda lo.
UChioora, ongunobhala weZina, ekhuluma eseHarare, uthe amazwe kaMasenda bawezwa kahle njalo bazalandela akutshoyo.
“Inkundla zakoBulawayo sizazisebenzisa. Sikhangelele ukuthi kubelemidlalo eminengi kuyo.”
IZoc ithe lonyaka inhloso yayo ngeyokukhankasela imidlalo ekhanya ingelasekelo olunengi nxa kuqathaniswa leminye.
“Siqina ngokuthi imidlalo le ebizwa ngokuthi incane layo ithole usekelo. Okunye okumunyethwe kunhlelo zethu yikuthi sidonse abantu kumidlalo efana lokuntsheza. Nxa umdlalo othile ungaba losekelo, abadlali labo bayaphumelela. IZoc ifuna imidlalo yonke isekelwe okuzenza ukuthi lalapho sikumaOlympics, isizwe silandele abadlali bayo ngokugcweleyo.”
Umongameli lo wengeze ngokuthi inhlanganiso zemidlalo kumele zibambe ithalenta lisesemanzi ezikolo.
“Umzekeliso esilawo ngokuthola umdlali esakhula ngokaKirsty Coventry. UKirsty samthola ngokudlala nje esafunda. Khathesi useyingcitshi. Inhlanganiso eziphethe imidlalo yethu layo ayilandele indlela ezahlangana loKirsty. Igoqwa isesemanzi phela,” nguMasenda.
