uMthunywa
Yintatheli kaMthunywa
OMUNYE wabaqeqetshi benguqu abahlonitshwa kakhulu kuleli uMoses ‘‘Bambo’’ Chunga useveze ukuthi inhlanganiso yeZimbabwe Football Association ayilancedo ngoba isiyehlulekile ukuphathisa abaqeqetshi.
UChunga ngomunye owasungula umbuthano wabaqeqetshi oweZimbabwe Soccer Coaches Association.
Umqeqetshi lo ukhulume lokhu kulandela ukuchothozwa kwenyathelo labo lokuba lenhlanganiso entsha.
Ukhulume kanje ebukele imidlalo yabasakhulayo eyenkezo yeCopa Coca-Cola ebiqhutshwa koBulawayo ngempelaviki.
Ekhuluma lephephandaba likazulu umgcinisihlalo wenhlanganiso yabadlali entsha uChunga, uthe baqoqa imidlalo le ngenhloso yokuthi bahlanganise amalunga abo ukuze kuphendukiswe ubudlelwano bakudala.
“Sifuna ukuthi abaqeqetshi bakwazi ukuzikhulumela lokuthi bathole ukumelwa ikakhulu kundaba zemali. IZifa angiboni ukuthi izaphathisa ngendlela ekhokhelwa ngayo kulezinsuku.
“Ikusasa lenguqu lingaba lihle nxa iZifa ingasekela abaqeqetshi kulokuthi ibanyathelele phansi.”
Uqhubeke wathi uphezulu kokuqoqa imidlalo yobungane phakathi kwabaqeqetshi ekupheleni kwesizini yalonyaka.
“Akwandanga ukuthi abaqeqetshi bakhulumisane nxa besemdlalweni, sihlala sithethisana kokuphela.
“Imidlalo le izadala ukuthi sikhulumisane kube lengqubekela phambili. Nxa sesihlala phansi kunhlanganiso yethu kuzakuba lula ukuthi silungisise inkinga ezihlupha thina hatshi abanye abantu. Sesidiniwe ngokukhokhelwa ngabantu abangazi lutho ngomsebenzi wokuqeqetsha.”
UChunga uthe uzaqoqa imidlalo labaqeqetshi abasedolobheni lakoBulawayo lakwezinye indawo.
“Siyabuya koBulawayo ukuzodlala omunye njalo umdlalo wokubambanisa abaqeqetshi bethu.”
Uthe badinga ukuthi babumbe inhlanganiso elezifiso zabaqeqetshi kuphela njalo abafuni kumelwa yiZifa.
“Wake wezwa iZifa ikhuluma ngokuthi izalungisisa udaba lokuqhatshwa kuhle kwabaqeqetshi. Akula ngitsho lelanga elilodwa. Ngakho ukubumba inhlanganiso yethu akumelanga kuhluphe umuntu ngoba yi-democracy phela,” nguChunga lo owaziwa kabanzi ngokukhuluma aze ajulise.
UChunga uthe ngaphandle kokuthi abaqeqetshi bakhulume ngobubi obenziwa kuZifa, akusoke kulunge kunguqu yeZimbabwe.
Kubikwa kulehlekana lenkokheli ezilezikhundla kuZifa ezibona angathi nxa abaqeqetshi bengaqoqa inhlanganiso yabo bazabizwa ngokuthi ngabahlamuki.
