uMthunywa
YiNtatheli kaMthunywa
IMISEBENZI emihle eyenziwa nguArthur Maphosa umphathisikolo weGwanda High School isibonakala nanko phela usekhethwe ukuba ngunobhala wenhlanganiso yezemidlalo yezikolo eyeConfederation of Southern Africa Schools Sports Association (Cossasa).
Kubikwa ngeviki edluleyo abaphathi bezemidlalo kulumhlubulo weAfrica abenze umhlangano kwele-Namibia, bavumelane ngokuphangisa ukuthi akula omunye ongenelisa ukwenza umsebenzi lo ngaphandle kukaMaphosa.
UMaphosa ungena esihlalweni ebesiphethwe ngu- Hilbertine Mbasuva weNamibia.
Okwamanje kuleli nguye ophethe isihlalo sikamongameli wenhlanganiso yeNational Association of Secondary School Heads (Nash).
Ekhuluma lephephandaba likazulu ngoLwesibili uMaphosa uthe ubonga usekelo alutholileyo.
“Lesi yisitshengiselo sokuba iZimbabwe iyahlonitshwa kwezemidlalo kulumhlubulo wezwekazi leAfrica. Mhlawumbe ngithole usekelo lula ngoba isizwe sakithi besihlala sinqoba kumidlalo kuminyaka edluleyo. Kuyabonakala ukuthi silakho ukwenza okukhulu ngobukhokheli kwezemidlalo.
“Ngibonga bonke abaphatha umsebenzi wokuqhuba inhlelo ze-Cossasa ikakhulu uJohnson Madhuku. Umsebenzi awenze lathi usinikeza ukuzethemba,” kutsho uMaphosa.
Kusenjalo iqula labaphathisikolo abakunhlanganiso le bakhethe njalo lo-Solly Duiker we-Namibia ukuthi abengumongameli.
Abanye abangene ezikhundleni babalisa uDino Dlamini waseSwatini obengumsekeli kamongameli, uChipangano Tembo, Stanford Tlali (Lesotho) wezomthetho loJonas Letsweletswe (Botswana) osezibambe kwezokuthengiselwana lobudlelwano lomphakathi.
