uMthunywa
USEKHANGELE umdlalo olandelayo kaGroup D umqeqetshi weqembu lesizwe leNigeria, uGernot Rohr ngemva kokuthi ezakhe zikhale ngaphansi kweCroatia nge 2-0 emdlalweni wazo wokuvula iNdebe yoMhlaba eseRussia.
Ukaputeni weCroatia, uLuka Modric, utshaye umbekwa obe yisipikili sokucina kulumdlalo obungeSonto ebusuku. Ibhola elihlohliweyo lokuqala kube ngumkhonto ogwaze ekhaya ka-Oghenekaro Etebo kade uModric etshaye ikhona kuhlandla lakuqala.
Lo bekungumdlalo wesibili kaGroup D njengoba kowokuqala kutholene i-Argentina le-Iceland ababambane nge 1-1. Impumela ibeke amaSuper Eagles emsileni kanti iCroatia iphakeme.
Umdlalo olandelayo wamaSuper Eagles ungoLwesihlanu eVolgograd Arena ngo-5 ntambama lapho ezatholana phezulu le-Iceland.
“Akekho umuntu othanda ukwehlulwa kodwa siyakuqonda ukuthi iCroatia ibiliqembu elingcono kulathi. Abadlali bami abasebancane benze amaphutha. Igoli lokuqala liqhamuke ngekhona kwathi elesibili kwaba ngumbekwa. Ngicabanga ukuthi labadlali basebancane basadinga ukufunda, kwesinye isikhathi bakhombise ubudedengu ikakhulukazi uma kutshaywa amakhona lama-free kick. Kuzomele sikulungise lokho,” kutsho uRohr.
Mayelana lokudibana le-Iceland okuyilizwe elilabantu abangaphezulu kuka-300 000, uthe: “Kumele samukele lokhu kuhlulwa kodwa kumele siwine ku-Iceland. Uma sinqoba umdlalo wethu olandelayo kungenzeka loba yini ukuze sidlulele phambili (kuLast 16).
Inkakha yaseNigeria uJay-Jay Okocha, obehlaziya umdlalo kuSuperSport, izwakalise ukungagculiseki ngezinqumo zikaRohr.
“Umqeqetshi akazange ayisebenzele imali yakhe lamuhla. Abaqeqetshi bakhona ukuze benze izinqumo, yena uthathe izinqumo okungezona ikakhulukazi kusengu 1-0,” kutsho uOkocha.
