uMthunywa
Nkosilodumo Ndebele
BATSHO beqinisile abadala nxa bethi ithemba kalibulali ngemva kokuthi isifiso seqembu lenguqu elidlala kuligi yezokholo iFlying Stars esokuthi bethathe ikhefu bephezulu kwamanye amaqembu ngamaphuzu sibulawe yiSpirit Filled Ministries ngoMvulo.
ISpirit Filled Ministries yenelise ukubhaxabula iqembu leAssemblies United 11-0.
Lokhu kubenze badlula iFlying Stars ngehola lokucina bengakathathi ikhefu ukuthi bebephezulu kuligi.
Loba kunjalo, umkhokheli weqembu leFlying Stars u-Evans Madhuku uthe impi kayikapheli.
“Sehlulekile ukuthi sigcwalise isivumelwano sethu labadlali ukuthi siqede ingxenye yokuqala yesizini siphezulu kweligi. Kodwa indoda ngewa ivuke, kungakho ngilethemba lokuthi sizavuka siyidlule iSpirit Filled Ministries, sithathe inkezo siyihambise ekhaya.
Uqhubeke wathi ukulimala kwabanye abadlali bakhe ngesinye isizatho esinikeze iSpirit Filled Ministries ithuba lokuthi babedlule.
“Silabadlali abambalwa abalimala emidlalweni eqakathekileyo okwayenza sayekethisa ukuthi sithole amaphuzu wonke kodwa ngilethemba ukuthi bazasila siqhubekele phambili ngomdlalo,” kutsho uMadhuku.
Umkhokheli weqembu leSpirit Filled Ministries uFarai Manago uthe iqembu lakhe lalo alisoze libe lisabuyela emuva ngoba isikhathi sengxenye yesibili yesizini siqakathekile kakhulu.
“Njengoba sesike sakuzwa ukuba zinkunzi emaqenjini eligi yesonto sizimisele ukugodla lesisikhunda. Asisoze siyekethise sisukela lamuhla siqhubekela phambili sizabe sigadle ngamazinyo omhlathi ukuthi siqhubekele phambili sinqoba.
Kweminye imidlalo, iSangano Legends inqobe iSt Patricks 6-0 kanti iEagle Life idle iSaints 2-1.
I-Eagle Life kumdlalo wabo wesibili idle iGrace Christian Church.
NgoLwesibili amaqembu wonke laa ayi-15 adlale umncintiswano welanga elilodwa ukuthi bekhumbule amaqhawe alwela inkululeko yelizwe lethu.
Iqembu leSangano Legends liwunqobile kulumncintiswano ngemva kokudla iSpirit Filed Ministries.
Umkhokheli weSangano Legends, uTimothy Mandidzadza uthe ube lokujabula okukhulu ngokuthi abadlali bakhe baphumulele kulowomncintiswano.
