uMthunywa
YiNtatheli kaMthunywa
IQEMBU le-Talen Vision eliqeqetshwa nguMkhuphali Masuku libika ukuthi alisoze livume ukwedlulwa ngamanye amaqembu ngoba yilo elizaphetha liyintshantshu yenkezo ye-Landa John Nkomo Memorial.
Inkezo le idibanisa amaqembu amane aphezulu kulogu kanobhutshuzwayo weligi ka-Division One kumhlubulo ongezansi yelizwe. Imvuzo ihlawulelwa yinkampani yeLiqour Hub nge-$5 000.
Imidlalo yenkezo idlalwa kulimpelaviki lapho i-Talen Vision ezadlala leTsholotsho enkundleni yeLuveve. Intshantshu zakulisizini iHwange zinxusa umakhelwane iZPC Hwange.
Ithimu ezanqoba ithola i$1 300. Ezadliwa ku-final ibuyela ekhaya le-$600 kuthi ezokucina ezimbili zinikezwe i$300.
Abadlali be-Talen Vision bavule amehlo bekhangele umvuzo wakuqala.
UMasuku, ekhuluma lephephandaba likazulu uthe uhlose ukuphakamisa inkezo. Ubike ukuba utshayela ihlombe abadlali bakhe ngomsebenzi asebewenzile ngokudlala kuhle kulisizini.
“Iqembu lethu lizaphumelela. Nxa singaqhubeka sidlala ngendlela esidlala ngayo kuligi, angiboni lutho olungasivimba ukuthi siyebamba inkezo yeLanda John Memorial,” kutsho uMasuku.
Kusenjalo umqondisi weZimbabwe Football Association ezansi yelizwe uAugustine Ndlovu uthe inkampani yeLiqour Hub izaphinda njalo isekele umkhosi wokubonga abadlali.
“Imidlalo yeLanda John Memorial izakuba khona ngempelaviki. Amalungiselelo wonke aqondile. Leli lihlandla lama-semi-final.
“Mhlaka 2 kuMpalakazi sizakwenza umkhosi omkhulu wokubonga abadlali. Sibeka isibongo esikhulu kunkampani yeLiqour Hub,” nguNdlovu lo.
Uluhlu lwamathimu enkezo yeLanda John Nkomo Memorial:
NgoMgqibelo:
-Tsholotsho v Talen Vision (Luveve, 3pm).
NgeSonto:
-Hwange v ZPC Hwange (Colliery, 3pm).
