uMthunywa
. . . Bazali lingenzi isihluku ebantwaneni
Akula sikolo esifundisa abantu ukuthi bakhulise njani abantwababo, loba nje kulezinsuku, sekulabanye abalobi asebebhala ngendlela zokunakekela abantwana. Lanxa kunjalo balutshwane abathinta ngelungelo labantwana lokwaziwa kulo umhlaba. Kulabanye abazali abakwaziyo ukuthi kumele banakekele abantwababo bengakhunjuzwanga, kube labanye abasuke bakhohlwe umsebenzi wabo njengabazali. Ukudla lezigqoko akwenzi umntwana enelise ukuthi aye esikolo, kodwa kudingakala ukuthi abe lencwadi yakhe yokuzalwa.
Abazali bonke kumele bahlale becabanga ukuthi abantwababo bayakhula, njalo bayawabona amaphutha lempambaniso abazenzayo. Abantwana bafuna ukuthi nxa bekhula, abazali babo babengabantu abalesithunzi abakhangelela kibo ukuthi bathole loba yini abayifunayo.
Abazali bengaqala ukwehluleka ukunakekela abantwababo, bacina bebona sengathi ababathandi ngoba phela, bayabe bebona ontanga babo besenzelwa izinto ezinengi ezibajabulisayo. Kuqakathekile ukuthi abazali kukhanye ukuthi bayazama kulokuthi bahlalele izandla.
Kule iviki ngithole ithuba lokuxoxisana lomama wakoSithole uRosina. USithole ngumakhelwane kaStephen Maseko lo Jane Mathuthu. Uthe seleminyaka engu-16 esazi uStephen loJane kusukela belijaha lentombi. Uthe ababili laba balabantwana abayisithupha, amankazana amathathu lamajaha amathathu. Kubo bonke laba abantwana akula oyake aye esikolo ngoba abazali babo bathi abalancwadi zokuzalwa.
UMaseko uthi bancitshwa ama-birth confirmation records ngenxa yokuthi babelesikwelede esibhedlela lapho uMathuthu abelethela khona abantwana abane. Kukanti laba abanye ababili, wababelethela endlini kibo eFilabusi, njalo kalamali yokuthi agade ibhasi ayekibo njalo lonina owambelethisayo sowabhubha.
USithole uthi nxa ebabuza ukuthi bayake bayebuzisisa ngesikwelede abalaso esibhedlela, baphendula besithi sinengi kakhulu njalo bayesaba lokuyabuza ngoba abalamali yokusibhadala. USithole uthe okumdanisayo yikuthi abazali akula lutho abalwenzayo olubambekayo olutshengisa ukuthi bayazama kodwa bayehluleka ukuthi batholele abantwababo incwadi zokuzalwa. Uthe abantwana laba bazwisa njalo usizi nxa bebona abanye besiya esikolo bona bengakwazi ngitsho lokubhala amabizo abo.
Abantwana sebazama ukuthi bakhulume labazali babo ukuthi bazame ukubathathela incwadi zokuzalwa kodwa akula phakathi kwabo okhanya elomdlandla wokuthi azwe etshiseka, elomlandu wokuthi azame ukukhulumisana lomunye wakhe ukuthi bayethathela abantwana incwadi zokuzalwa.
UMaseko loMathuthu abasebenzi kodwa baphila ngokulima imbhida bethengisa. Nxa bexoxisa loSithole bathi bona abalamali ngaphandle kweyokuthenga ukudla.Ababili laba kabafuni lokuyadinga usizo lolwazi lokuthi bangathatha nyathelo bani ukuthi bathathele abantwababo incwadi zokuzalwa.
Mina okunye okwangidanisayo yikuthi ababili laba behluleka ukuzibuyela ewofisini yami kodwa bakhetha ukuthi banike umakhelwane wabo izithupha zabo lama-health cards abantwana ukuthi azokuzwa ukuthi bengenza njani ukuthi benelise ukuthola incwadi zokuzalwa zabantwababo.
Ngithanda ukuthi ngikhuthaze abazali ukuthi bafe bezamile ezintweni eziphathelane labantwababo, ngoba yibo abayabe sebekhala futhi nxa abantwababo sebebazonda bengasafuni kubasiza nxa bona sebeluphele. Kuhle nje ukuthi njengamuli sibelobudlelwano obuhle.
Mzali yazi ukuthi umntwana kazicelelanga ukuza emhlabeni, umnakekele ukuze laye anakekele eyakhe imuli kanye lawe. Bayatsho abadala ukuthi ukuzala yikuzimbela.
Asihlanganeni ngeviki elizayo
l Umlobi uthinteka kukheli ethi [email protected]; Laku nombolo ezithi 0773 195 055/ 09 881508
