uMthunywa
Trevor Mhlanga
Sengike ngantsheza edamu lothando, kumnandi yonk’ into. Sasixoxa ecingweni, ingxoxo zangasese eziqumbaqumba imizwa, zigijimis’ igazi, kutsh’ iz’tshebo njalo sasithi singabonana sinamathelane okonwabu esihlahleni.
Kwaku yibunandi obungechasiswe nsuku zonke, kodwa kwaphela. Ngisakhumbula lamanje amagama esasibizana ngawo, ngamazwi apholileyo lathathekisayo kwangathi aqale akhanzingwa engakaphumi emloyeni.
Amehlo ayethi angathi ngqwa, ngimuthi nhlo, ngizwe inhliziyo incibilika, yonk’ into isiba mncwa ngaphakathi ngize ngehluleke lokuzithinta. Ngangimdumela umntwan’ omuntu aze aqale ukukhefuzela angathi uyaphela umoya.
Ubuthembele kuye wakutshayisa idwala ngempama, esenelisa ukukwenza lokho okukhangeleleyo, kungela nto emenqabelayo njalo ekuthembisile, kodwa wazibona ususikha phansi. Lumuntu eseke wakusiza kokunengi, lawe uze umncome emphakathini kodwa nanso imvu yakho ikuxhwalela.
Akusibantu kuphela abasidanisayo empilweni, kwesinye isikhathi kungaba ngumumo womkhathi, kumbe umumo welizwe kwezombangazwe. Amacebo obulawo uwabone ethathwa ngumfula usale ubambe insiba zejuba. Wabanjwa xhaka ngumhedehede! Hayi bo!
Kwaba lolulodwa oluyisithutha lapha sihlangana endaweni, wayengazi ukuba mzwalokho kwakungasi suku lokuchelesa kodwa lokuthwala im’khono. Kwakungela sizatho loba sibonakaliso sento embi, kodwa mzwalokho ubudlelwano bethu baphela.
Angikhangelelanga ukuba ukuzwisise lokhu, ngoba akuzwisiseki ohlangana lakho lawe. Kuyathi ungonanga lutho, kodwa uthole okungakufanelanga longakudinganga. Inhlabathi yathelwa kumlilo ovuthayo wothando, umntanomuntu waphenduka isithombe okwesikhatshana engakukholwa okwenzakalayo.
Mina ngitsho ukumzwela kumbe ukuzisola, yimi lowaya calaceleni. Ungaqali ukuzibuza ukuba kwasekutheni?
Kwesinye isikhathi akudingeki ukuba kube lembangela yobuhlungu ohlangana labo, buyeza nje.
Nxa suphakathi komgigo lengiga lapho obukhangelele ukuba phakathi komhlane lembeleko, ungaqali ukuhlaba umkhulungwane.
Kubhahile ukuba ophanjanisiweyo ahlobise ubuso, adlavaze loba yini ayitholayo, qede ahlihle. Lokhu kwengezelela ubuhlungu lomonakalo. Kuyimvelo yoluntu ukudlula ebuhlungwini obungajwayelekanga ngenyembezi, kulungile njalo. Ikanti indlela eletha umahluko yikubona ngangale kwenyembezi.
Khala kodwa ungadangali udabuke udideke. Nxa isehlakalo esikuthithibalisayo besivele singakhangelelwangwa ingqondo kayibone obekuvele kukhangelelwe bese uziduduza ngakho. Chelesa ngalokho obukukhangelele ukuba kuzenzakala kube kuhle kuwe lanxa kungasenzakalanga.
Ingqondo kayithathi kuhle nxa usosizini, ngakho izinqumo ozithatha udidekile loba udanile kazandanga ukuhlabusa.
Inhliziyo echelesileyo iyaguqula intombi engiyilahlele egangeni izolo sankukhu etheswe umnyama ibe yisiqabhobho engasibona leliya langa ngimbona okokuqala ngiyizwe inhliziyo. Ungachelesa lawe uyaqala ukubona ubungcono besimo okuso, lendlela efaneleyo yokuthatha bese usenza izimanga.
Izehlakalo ezinganqatshelwanga ziyindlela yokukufundisa ukuphatha ezitshisayo loba ukusiphi isimo lokungahlali ukhathazeka emoyeni ngakho konke okuphambaniseka emehlweni akho. Akumelanga ukuba iziga zempilo zikuthamule, kufunakala ukuba uqhubeke umomotheka sengathi konke kukahle ukuze kubenjalo.
Thintana loTrevor Mhlanga kunombolo lezi: +263 775 523 605. Kumakheli omqhafazo lawa: [email protected], Facebook: Trevor Mhlanga; Twitter: @MhlangaTrev
