uMthunywa
Pathisa Nyathi – NgoLwesine sibesibuthene eNational Gallery koBulawayo. Umkhosi ebesibuthene ngawo ubungowokwethula umbukiso othiwa My Beautiful Home –Comba Indlu Ngobuciko. Lo ngumbukiso wezindlu zeMatobo emawadini u16 lo17. Abanye lingabe lisakhumbula ukuthi nyakenye senza umncintiswano wokucomba izindlu emawadini amabili angaphansi kwenduna uMalaki Masuku.
Kwathi ngemva kokwahlulela abanqobayo bazakuthi gwaqa e-Amagugu International Heritage Centre sebezephiwa imiklomelo yabo. Lokhu kwenziwa ngenyanga kaMpandula nyakenye futhi kungumkhosi wendabulangcubula. Ngakho umbukiso obusethulwa ngotshengisa izindlu ezaconjwa ngomnyaka odluleyo kube kanti futhi bekulithuba lokwethula umncintiswano walonyaka.
Sake satsho ngaphambilini ukuthi lonyaka umncitniswano ususuke wansansa, wasabalala, wadlondlobala wagoqela amawadi ambalwa athi u-15, 16, 17, 18, 24, 23 lo25. Lokhu kutsho ukuthi indawo yonke eyenduna uMasuku isithandelwe. Ngeviki elizayo nje uyaqala umsebenzi wokwahlulela. Lonyaka ewadini inye ngayinye abakuleyondawo bazaphathisa ekwahluleleni. Bazadinga abahamba phambili abane besekudingwa abazahamba phambili kwezokucomba ngaphakathi abathathu.
Iqula lalabo abavela koBulawayo lizakuza ekucineni ngenyanga kaNcwabakazi sekudingwa abanqobileyo kumawadi wonke-lapha sekuphuma abathathu abahambe phambili ekucombeni iphandle lendlu. Kuzaphindelwa khona e-Amagugu lapho abanqobi abazakwethulwa khona. Kodwa eGallery umkhosi ubusethula okwaconjwa ngomnyaka odluleyo.
Phela owayethatha imifanekiso nyakenye nguDokotela u-Andre van Rooyen. Zonke izindlu esazethekelayo wazithatha imifanekiso kanti belu yindoda evele ithanda ukuthatha imifanekiso ezintabeni zeMatojeni. Yikho umbukiso owawukhona wawugoqela eminye imifanekiso engasiyezindlu. Eminye bekuyimifanikiso ayithatha emazweni akude agoqela iTopiya leMozambique.
Abekhona aMahlabezulu kunye labantwana bakaMesisi. Isethekeli esihloniphekayo bekunguMfundisi uPaul Bayethe Damasane onguPrincipal Director oGatsheni lukaHulumende olukhangele ezeMidlalo, aMasiko loBuciko.
Abantu baqala ukuthonta ihola lesihlanu ntambama selizatshaya. Bathonta nje bahlangatshezwa zingungu ezicacadwa ngabeDrums of Peace, iqembu eliholwa nguLewis Ndlovu.
Ngakho abafikayo baqala ngokuthi gwaqa eqethwini phandle bengakaze baholwe phakathi lapho inkulumo ezethulwa khona. Ngokuya kwesikhathi kwakungasabizwa ozwayo abantu sebeyinyelane. Saholwa sayangena endlini lapho okwakuzakwenziwa khona imicimbi yonke. Babembalwa abethula inkulumo. Kwaqala ngoVoti Thebe onguMqondisi weGallery koBulawayo. Yena wayelezopha lokwamukela izethekeli. Ngemva kwakhe kweza omathatha imifanekiso laye wethula imibono yakhe ngohlelo olwasungulwa ngabantu abathathu, mina uVeronique Atalla loJohn Knight.
Ngemva kukaKnight kweza uVeronique owachaza indabuko yohlelo lokuthi seluqhele lwagoqela abanye abathi uViolette Ki-Tui, Clifford Zulu loButholezwe Nyathi. Lami ngaphiwa ithuba lokwethula eyami inkulumo emfitshazanyana ngasengisethula isethekeli esiqakathekileyo uMfundisi uDamasane owaqonqosela ukuthi yebo indoda iyayakha indlu kodwa umama nguye owenza ukuthi kube ngumuzi.
Watshayela ihlombe abasungula lolu uhlelo oluveza amasiko abaNsundu abesengathi ayacwila. Kwakhanya ukuthi umsebenzi ukhona ikakhulu owokuveza ukuthi kutshoni lokhu abakucombayo. Kayisizo zodwa izindlu eziconjwayo. Lobuso buyaconjwa, besesisithi yikubhuda. Thina ke sathi lumkhankaso nguBhudaza.
Zithe sezethulwe zaphela inkulumo sonke sathi zimu saya endlini ephezulu lapho okwakulemifanikiso khona.
Izethekeli zabhoda zibuka imifanekiso kwathi uMfundisi uDamasane wachazelwa ngayo ngumayithatha uDokotela van Rooyen. Lwaphela usuku sakhengelela usuku lapho umncintiswano lo ozakuyakhona eHarare.
