uMthunywa
YiNtatheli kaMthunywa
INKAMPANI yeHwange Colliery ibika ukuba izimisele ukuthi isekele ithalenta lezemidlalo nanko phela isiphindile ukuqoqa imqhudelwano edibanisa izisebenzi zayo, kumthimba ozaqhutshwa ngoLwesihlanu.
Imidlalo le iqhutshwa minyaka yonke njalo iHwange Colliery iyabe imanyane lenkampani ye-Old Mutual kuqhutshwa lumsebenzi.
Kumbiko ethunyelwe iphephandaba likazulu, izisebenzi zizancintisana kubangwa imvuzo kumidlalo ebalisa ibadminton, basketball, bowling, darts, golf, squash, tennis, netball, inguqu, volleyball, boxing, pool le-chess.
Idolobho leHwange liyaziwa ngokuqakathekisa ezemidlalo njalo kuminyaka edluleyo lindawo ibihwatsha ingcitshi zemidlalo ebezikhethwa ukuthi zidlalele isizwe.
Kungumbono walinkampani ukuthi ukuncedisa izisebenzi ukuthi zikhuthalele ezemidlalo kuzaphakamisa lomphakathi owakhelane lazo.
Isikhulumi senkampani uRugare Dhobbie ubike ukuthi bazaqhubekela phambili besekela izisebenzi kukho konke okuphakamisa impilo zabo.
“Imidlalo yethu yezisebenzi ikhona ngoLwesihlanu enkundleni ezehlukeneyo. Le yindlela yethu njengeHwange Colliery Company ukuthi sixhase izisebenzi zethu ukuthi zikhuthalelele ezemidlalo.
Amalungiselelo asesibangeni esiphezulu okwamanje, okutsho ukuba sesilinde ukuqala kwemincintiswano.
“Imidlalo le siyenza sibambene le-Old Mutual kanye le RM Insurance,” kutsho uDhobbie.
Kubikwa njalo inkampani yezimbamgodi le lonyaka ihlose ukukhumbula izisebenzi ezingu-472 ezabulawa mhla kudilika umgodi weKamandama ngomnyaka ka1972.
