uMthunywa
NguLungelo Ndhlovu
AMAQEMBU amabili abedlala emahlangeni kaDivision 3 eHwange i-Makomo kanye leMagagasi, asezadlala kuSouthern Region Division 1 lonyaka njalo kukhanya azimisele nanko phela asehle abhadala zonke imali zokungena kuligi.
Umgcinisihlalo wesabelweni seMatabeleland North, okhangele ezemidlalo kulesisabelo, uDennis Tshuma ubikele iphephandaba likazulu ukuthi ezemidlalo ziyaphucuka esabelweni sabo yikho nje amaqembu amanengi omdlalo kanobhutshuzwayo, ephatheka kuligi kaDivision 3.
UTshuma ubike ukuthi isabelo sakhe siphakathi kokwenza amalungiselelo omhlangano omkhulu weAnnual General Meeting (AGM) ozaqhutshwa edolobheni leFolosi.
“Sikhangelele ukuthi sibe lomhlangano omkhulu weAGM kuyonale iviki eChinotimba Primary ngenhloso yokuba sihlafune konke okuphathelane lezemidlalo esabelweni sakithi,” kutsho uTshuma.
Kuzwakale ukuba iligi kaDivision 3 iyakhula esabelweni lesi ngoba benika abadlali imvuzo yokwenza kuhle njengendlela yokubakhuthaza.
“Sike sathola usekelo lwemali sanika abadlali abenza kuhle izicoco. Lokhu sokuphathise kakhulu ukuthi amathalenta abonakale kubadlali esilabo,” kutsho uTshuma.
Kuzwakale ukuthi eDete kulamaqembu angu-16, eBinga kulamaqembu angu-12 kuthi eLupane amaqembu angu-14 adlala kuDivision 3.
