uMthunywa
YiNtatheli kaMthunywa
AMAQEMBU adlalelwa ngabadlali besizwe uMaverlous Nakamba loKnowledge Musona kubikwa aphakathi kwenkemenkeme kulandela ukuthenga kwawo abadlali okungekho emthethweni.
UNakamba udlalela iCircle Brugge. UMusona ugijimela iAnderlecht. Womabili amaqembu la ayetheswa icala lokuhuquluza imali lokuqilibezela impumela yemidlalo.
UNakamba loMusona abakho phakathi kwezigigaba ezenziwa ngamaqembu abo, loba nje kusobala ukuthi ikusasa labo kumaqembu la lisebunzimeni, nxa amaqembu engabanjwa elecala.
Umqeqetshi kaNakamba Ivan Leko loMogi Bayat omela abadlali kubikwa ngabanye babahlonitshwa edolobheni leBelgium asebekhulumisane lamapholisa kudingisiswa ngamacala.
Ukudingisiswa kwamacala la kuqale ngesizini ka-2017 kulandela umbiko wamapholisa owokuthi kulensolo ngendlela okutshintshwana ngayo imali kunguqu yeBelgium.
Kungumbono wamapholisa ukuthi ukuthengwa kwabadlali kulisizini ngamaqembu amakhulu kulelo kwenziwa ngenjongo yokuqila impumela yemidlalo.
Amapholisa kubikwa athumbe amaphepha esivumelwano sokudlala kubadlali ababalisa uObbi Oulare, Michel Preudhomme loDino Arslanagic ababengaphansi kuka-Bayat.
