uMthunywa
Silo C Dube kugwalo
SIQHUBEKA ngalo udaba lukaNkosiphile, ingane kaKhumalo loMaNdlovu. Sikhumbule ukuthi le yingane yezimanga. Yazalwa ingatshengisi ukuthi ingaba ngumuntu okhangelekayo ebantwini.
Ekuzalweni kwakhe izalukazi ezabelethisa unina uMaNdlovu, uMaKhuphe loMaNsingo zazithe kadluliswe njengesiko lakudala elalikhuthaza ukuthi nxa kuzelwe umntwana otshengisa ubulima kwakumele adluliswe ngokuphazima kweso.
UNkosiphile wasilela abazali bakhe abala ukuthi abulawe. UMaNdlovu wahle wazilandulela izalukazi lezo ukuthi ziludlulise usane lwakhe. Walindela ukuthi azwe ukuthi umyeni wakhe wayezathini ngalolodaba.
UKhumalo lanxa wayengathokozi ukuthi kuzelwe isilima emzini wakhe wathi uzaphila umntwana. Lokho kwakhulula uMaNdlovu owayelokwesaba ukuthi hlezi uKhumalo athi usane lwakhe lubulawe.
Lanxa uKhumalo wenza leso sinqumo wayetshengisa ukungamthandi umntwana ekuthatha sahlazo ukuthi kuzelwe isilima emzini wakhe. Wakubona sengathi yimisebenzi yabantu ababebangisana laye emsebenzini wakhe. Kwamkhathaza emoyeni wakhe uKhumalo ukuzalwa kwesiyelele emzini wakhe waze wafaka umthetho wokuthi engazabonwa ngabantu uNkosi.
UMaNdlovu wavalwa lokuthi aye enkonzweni lomntwana lowo. Wavalwa lokubonana labantu uMaNdlovu wahlala evalelwe endlini kwaqhutshwa amanga ayesithi kakho ngekhaya uMaNdlovu wayavakatshela abakwabo.
UKhumalo wayengahlalanga phansi kodwa ethi engaphuma ngekhaya athathe lelothuba lokuyadinga inyanga enjengaboMahaqaza, edinga ukuthi athole umuntu wokudlulisa ingane uNkosi. Siyambona kwelinye ilanga uKhumalo ebuya ehlomile ngomuthi ayewuphiwa yinyanga uMahaqaza ethi aludlulise usane olunguNkosi. Lokhu kwehlula ngoba lonina uMaNdlovu waqina ngemithandazo, ethandazela ukuthi usane lwakhe luphile.
Siyakhumbula ukuthi inyanga uMahaqaza yayimtshelile uKhumalo ukuthi lowo muthi eyayimnike wona ungehluleka ukumbulala umntwana angaphinde elinge ezame futhi ngoba lokho kwakungaba yingozi kuye uKhumalo. Uthe uKhumalo esesiya kwenye inyanga uBharimasoso, umoya wokumdlulisa uNkosi wawusudedile ngoba wakuveza lokho kunyanga le. Kasazange alinge ukumdlulisa ngoba wathi wayeseqalile ukumthanda umntwana.
Kwabalenguquko wathandwa uNkosiphile wazewasiwa esikolo iSir Humprey Gibbs. Lamhla sihlangana lemuli kaKhumalo ilokujabula okukhulu ngoba “isiyelele” esinguNkosi sesiphumelele ezifundweni zemisebenzi yezandla. Sabhuqa bonke ababekuviyo linye laye waze waphiwa isithupha esikhulu kulazo zonke. Umlobi uyasebenzisa icebo lokuloba lokungathi bhadla udaba ongalo kodwa wenze obalayo kumbe olaleleyo abelolukuluku lokwazi okulandelayo.
Nxa uVundla lomkakhe uNothando befika loNkosi ekhaya koKhumalo, bayathaba abakoKhumalo ukuthi sekufike izethekeli kodwa babelokudana kancane. UVundla uthi kumele udadewabo bamhlabise ngoba wazalela uKhumalo izingane ezibukhali ezifundweni. Waqhubeka ethi balapho nje bezofakaza ngalokho.
UNothando uyamkhuza uVundla ukuthi usengahle agagamele udaba abangalo bengakahlali laphansi.
UMaNdlovu uthi uqinisile uVundla lapho esethe uNothando kamekele akhulume ngoba imbayimbayi yaqeda amaKula. UKhumalo uxwayisa uMaNdlovu ukuthi engabahambeli phambili oVundla ethe abangene endlini ukwenzela ukuthi ingabe ubadilizela phansi lowo mbiko wabo, kwenzakale bengabacatshileyo bengabonwa muntu.
UKhumalo uthi umthabo ababelawo ngokufika kwezethekeli, wawusuphungukile futhi usuthundubele. Wayilandisa indaba yokuphumelela kukaNkosi uVundla yaphuma kuhle. Kwadliwa kwabakuhle ngalelolanga.
Kuthiwa uNkosi nxa exoxela abafowabo khathesi, uthi into engamjabulisanga esekhaya ngaleliya khefu yikuthi akakho loyedwa owangekhaya ake amuzwa exoxela abantu esontweni ebazisa ngokuphumelela kwakhe okungako ezifundweni zakhe ngalowo mnyaka. Kakwazanga uNkosi ukuthi kwakunguyise uKhumalo owayebaxwayisile abomuzi wakhe wathi kafuni bahambe beyihlanyela indaba yokuphumelela kwakhe.
Uphetha ngokuthi, “Abantu ungeze wabathemba.”
